ASNN – Korabi synon fitoren e radhës ndaj Olimpikut në Kategorinë e Dytë të Kampionatit Kombëtar të Futbollit, për të siguruar edhe pas javës së 5-të të kreut në grupin e Veriut. Pas asaj fitoreje të merituar ndaj bardhebluve B, futbollistët dibranë i janë kthyer stërvitjes për të përgatitur këtë ndeshje, të cilën do ta luajnë në fushë të huaj. Për gazetat sportive të ditës, kapiteni i Korabit, Lleshi, deklaron se skuadra është e përbërë nga një grup lojtarësh të mirë.

“Për më tepër, – thotë ai, – jemi një grup lojtarësh që luajmë prej vitesh bashkë, ndërsa edhe lojtarët e ardhur janë ambientuar mirë me ne. Dhe këtë e tregojnë edhe fitoret që kemi arritur, ndërsa kryesojmë me meritë Grupin e Veriut në Kategorinë e Dytë. Aq më tepër që kemi pasur dhe mbështetjen e drejtuesve të klubit, ndërsa jemi duke luajtur futboll të ndershëm, sepse kemi arritur katër fitore, kemi 12 pikë dhe kemi një golaverazh pozitiv, prej 9 golash të shënuar dhe vetëm 3 të pësuar.”

“Duhet të qëndrojmë me këmbë në tokë dhe duke mos nënvlerësuar asnjë ekip të vazhdojmë të kryesojmë në Grupin A, – ka theksuar Lleshi. – Jo vetëm kaq, por me mbështetjen e tifozerisë vendëse të arrijmë që të shpallemi “kampionë të dimrit”. Pse jo të synojmë dhe ngjitjen në Kategorinë e Parë. Këtë javë do të kemi dhe tifozerinë tonë nga pas, sepse e dimë që Lad Cenga, një nga mbështetësit më të zjarrtë të skuadrës, që ka vënë dy furgonë për ata të cilët kërkojnë të na vijnë nga pas.”

“Dhe ne do të fitojmë për tifozët tanë”, – ka përfunduar kapiteni i Korabit, Lleshi.