ASNN – Në seancën e sotme paradite mesfushori Ermir Lenjani nuk ia doli as të stërvitet. Ai u pa duke çaluar dhe në fund u largua nga grumbullimi, duke mos ia dalë të jetë në dispozicion të trajnerit Kristian Panuçi për duelin e madh të 17 nëntorit kundër Skocisë. Problemet e Lenjanit kishin filluar ditë më parë, dje e bëri pushim për të rikuperuar energjitë, por sot në mëngjes u pa qartë se lojtari nuk është i gatshëm.
Ai ka problem dëmtimi dhe do të detyrohet të braktisë grumbullimin e kuqezinjve në Durrës. Si të mos mjaftonte Lenjani, një tjetër lajm i keq për trajnerin Kristian Panuçi vjen nga brenda grupit. Edhe Eros Grezda ka probleme. Ai dyshohej dje dhe zbriti sot në stërvitje, por e nisi me 10 minuta me vonesë, pasi u këshillua me fizioterapistin Ylli Mihali.
Grezda ka një shqetësim muskular që mund ta rrezikojë të mos luajë në dy duelet e radhës ndaj përfaqësueses. Dje Grezda mbajti akull në këmbë për të mos rrezikuar, ndërsa sot bëri një seancë stërvitore të diferencuar. Synimi i stafit mjekësor të Kombëtares është ta ndjekin me kujdes rikuperimin e Grezdës në mënyrë që ai të jetë gati për duelin me Skocinë.
Grezda po kalonte një moment mjaft të mirë me Gllasgou Rejnxhërs dhe vinte nga një dygolësh fantastik, teksa njeh mirë dhe lojën e kundërshtarëve. Mbetet të shihet rikuperimi i tij, teka i gjithë stafi shpreson që ai të jetë i gatshëm për duelin e 17 nëntorit në “Loro Borici” të qytetit të Shkodrës. Largimi i Lenjanit hap probleme, por Panuçit i duhet të bëjë pa të.
Por edhe të shohë mundësinë e angazhimit të Egzon Binjakut në këtë krah, ose të Emanuele Ndojit apo Ledian Memushajt. Me dëmtimin e Lenjanit dhe mungesën e sigurt të tij, por edhe rrezikun e mosrikuperimit në kohë të Grezdës, ka gjasa që trajneri italian të ndryshojë skemë për ndeshjen ndaj Skocisë.
