ASNN – Trajneri i Kombëtares shqiptare, Xhovani De Biazi, do të zyrtarizojë të shtunën listën e futbollistëve, që do të grumbullojë për dy ndeshjet e fundit në eliminatoret e Euro 2016 kundër Serbisë dhe Armenisë. Për këto dy sfida vendimtare, trajneri pritet të rikthejë në skuadër Mërgim Mavraj dhe Alban Mehën. I pari është rikuperuar nga dëmtimi dhe ka nisur të stërvitet me skuadrën e Këlnit në Gjermani. Nga ana tjetër, Meha po bën një paraqitje të shkëlqyer me Konjasporit në kampionatin turk dhe në 6 ndeshje ka realizuar dy gola.
Federata Shqiptare e Futbollit ka bërë të ditur se të shtunën, De Biazi do të mbajë edhe një konferencë për shtyp. Grumbullimi i Kombëtares Shqiptare do të nisë të hënën, pas përfundimit të ndeshjeve të kampionateve. Me ndonjë përjashtim të vogël, trajneri i Kombëtares Shqiptare të Futbollit, Xhovani De Biazi, do të zbresë në fushë në ndeshjen e 8 tetorit 2015 ndaj Serbisë të njëjtën skuadër sikurse në ndeshjet ndaj Danimarkës dhe Portugalisë të luajtura në shtator.
Edhe pse ai ruan surpriza të minutës së fundit në formacion, nuk ka dyshime që trajneri nuk do të mund të guxojë të bëjë eksperimente të reja në një fazë vendimtare për kualifikimin dhe sidomos ndaj një kundërshtari si Serbia, e cila vjen me objektiva të qarta për të frenuar ekipin tonë të arrijë kualifikimin. Në mesfushë ka një dëmtim që sjell mungesë të sigurt dhe ai është Burim Kukeli, vendin e të cilit me shumë gjasë do ta zërë njëri ndërmjet Ergys Kaçes ose Alban Mehës.
Në mbrojtje, në krahun e djathtë të saj, do të kthehet Elseid Hysaj, kurse në qendër mbetet në pikëpyetje kapiteni Lorik Cana, tashmë i dëmtuar, mund të luajë në krah të Ajetit ose Gjymshitit. Në krahun e majtë Agolli është i paprekshëm. Në mesfushë Xhaka, Lenjani, Abrashi do ta nisin nga minuta e parë, ndërsa dilema ka rreth Mehës, Kaçes, Roshit dhe Gashit për dy vende titullari. Në sulm do të ketë një zgjedhje midis Cikalleshit dhe Balës.
Por deri në mbrëmjen e 8 tetorit, trajneri De Biazi mund të vijojë të fantazojë pse jo të eksperimentojë edhe formulë tjetër përballë serbëve
