ASNN – Sot në mbrëmje Shqipëria do të luajë me Rumaninë, ndeshjen e tretë të vlefshme për grupin A, në Euro 2016. Deri tani kuqezinjtë kanë pësuar dy humbje, ndaj, në Stadiumin e Lionit, djemtë e De Biazit luajnë të gjitha shanset për kualifikim. Vetëm fitorja i mundëson Kombëtares kuqezi shansin e kalimit të grupit si një nga skuadrat e treta me renditjen më të mirë në grupe.
Shqipëria luan shansin e fundit sot në mbrëmje, të qëndrimit ose jo më tej në fazën finale të Euro 2016, kur në stadiumin e Lionit, do të ketë përballë Rumaninë. Për të patur një mundësi kualifikimi, si një nga katër skuadrat e treta më të mira, kuqezinjve u duhet patjetër fitorja. Pas dy ndeshjeve të para të humbura, do të provohet të shënojnë golin, i cili do t’i çojë drejt vazhdimit të ëndrrës.
Ndaj Rumanisë, trajneri Xhovani De Biazi ka vendosur të aktivizojë këtë formacion në sfidën ndaj Rumanisë: në portë Berisha, në mbrojtje Hysaj, Cana, Mavraj, Agolli. Në mungesë të Kukelit të pezulluar për shkak kartonësh, organizator do të jetë Migjen Basha. Mesfushorë të tjerë janë: Lenjani, Abrashi, Memushaj dhe Lila. Në sulm, do të jetë sërish Sadiku, edhe pse ka shpenzuar shumë energji në ndeshjen e fundit me Francën.
Ndeshja Shqipëri-Rumani do të gjykohet nga çeku Pavel Kralovec. Për trajnerin De Biazi do të mungojnë në këtë sfidë, Naser Aliji dhe Taulant Xhaka, të cilët janë dëmtuar në stërvitjen e fundit. Për shkak të shiut të rrëmbyeshëm që ka rënë në Lion, tapeti i blertë i fushës së stadiumit ku do të luhet sot në mbrëmje ndeshja Shqipëri-Rumani është dëmtuar.
Ndaj UEFA, edhe për të përfituar kohë në rikuperimin e fushës, ka vendosur që skuadrat, si Rumania dhe Shqipëria të mos stërviten në këtë stadium. Seancat stërvitore skuadrat i kanë kryer në stadiumin e vjetër të Lionit.
