ASNN – Miqësoret ndaj Kilit & Suedisë, trajneri Silvinjo publikon listën me emrat e 26 lojtarëve të ftuar. Kombëtarja shqiptare do të luajë dy takime miqësore, atë ndaj Kilit më 22 mars dhe atë ndaj Suedisë më 25 mars. Përgatitjet për këto dy ndeshje do të nisin të hënën, më 18 mars, teksa trajneri Silvinjo ka publikuar të premten edhe listën me plot 26 lojtarë të grumbulluar.
Përsa i përket portës janë të njëjtët futbollistë, Etrit Berisha, Thomas Strakosha dhe Elhan Kastrati. Në mbrojtje rikthehet Marash Kumbulla, i cili ka lënë pas dëmtimin e rëndë dhe gradualisht po merr minuta me klubin e tij, Sasuolon. Emrat e tjerë që përbëjnë repartin e prapavijës janë Berat Gjimshiti, Elseid Hysaj, Ivan Balliu, Enea Mihaj, Frederik Veseli, Jon Mersinaj, Mario Mitaj dhe Naser Aliji.
Ashtu si në portë edhe në mesfushë janë të njëjtët lojtarë Ylber Ramadani, Kristjan Asllani, Qazim Laçi, Keidi Bare dhe Nedim Bajrami. Ndërsa në repartin e sulmit ka risi por edhe rikthime. Kështu, trajneri Silvinjo ka vendosur të thërrasë për herë të parë në Kombëtaren kuqezi sulmuesin Arbër Hoxha, i cili aktivizohet me Dinamon e Zagrebit në Kroaci.
Në Kombëtare rikthehet edhe Rei Manaj, i cili po zhvillon një sezon shumë të mirë me klubin e tij në Turqi. Pjesa tjetër e lojtarëve që përbëjnë repartin e avancuar janë Taulant Seferi, Myrto Uzuni, Ernest Muçi, Jasir Asani, Arbnor Muçolli, Sokol Cikalleshi dhe Armando Broja. Trajneri Silvinjo do të dalë në një konferencë për mediat të shtunën, më 16 mars, në ora 11:00, në “Shtëpinë e Futbollit” në kryeqytet.
Ai do të flasë aty në lidhje me listën dhe dy ndeshjet miqësore të Shqipërisë ndaj Kilit dhe Suedisë. Ndërkaq, grumbullimi i lojtarëve do të nisë që të dielën në Tiranë me futbollistët që do të përfundojnë më herët impenjimet me skuadrat e tyre, ndërsa grupi i lojtarëve do të jetë i plotë të hënën më datë 18 mars 2024. Seancat stërvitore do të zhvillohen në “Shtëpinë e Futbollit”.
Ndërsa të enjten kuqezinjtë do të udhëtojnë drejt Parmës, aty ky më 22 mars do të luhet edhe ndeshja e parë miqësore ndaj Kilit në stadiumin “Enio Tardini”, duke nisur nga ora 20:45. Pas sfidës me Kilit, Kombëtarja do të luajë një tjetër përballje miqësore me Suedinë. Kjo ndeshje do të zhvillohet më 25 mars në Stadiumin “Friends Arena“ të Stokholmit në Suedi, duke nisur nga ora 19:00 me orën e Tiranës.
