ASNN – Telenovela “Trajneri i Kombëtares” drejt fundit, Duka cakton javën e ardhshme si “seria e fundit”. Kombëtarja nuk ka ende një emër në krye të stolit të saj. Që prej shkarkimit të trajnerit Kristian Panuçi, përfaqësuesja nuk e ka ende “timonierin” e saj, megjithëse përkohësisht e drejtuan atë në duelin kundër Andorrës Ervin Bulku dhe Sulejman Mema.
Megjithatë, javën e ardhshme mund të kemi një emër zyrtarisht dhe këtë e konfirmoi sot nga Shkodra Presidenti i Federatës Shqiptare të Futbollit Armand Duka. “Besoj se javën e ardhshme do të kemi edhe emrin e trajnerit të ri të Kombëtares, – u shpreh Duka para gazetarëve, pasi i dorëzoi Bashkisë së Shkodrës çelësat e Stadiumit të rindërtuar “Loro Borici”.
“Por edhe plotësimi e të gjithë stafit teknik, pasi qershori vjen shpejt dhe do të duhet të nisin përgatitjet për dy ndeshjet eliminatore”, – ka shtuar ai. Ndërkohë, sa u takon emrave, Edi Reja mbetet kandidati kryesor për të marrë drejtimin e përfaqësueses kuqezi, por deri në momentin e fundit nuk i dihet. Fakti që Duka ka caktuar javën e ardhshme si vendimtare është se pret përgjigje nga njëri prej kandidatëve.
Dhe në media për Rejën është folur më shumë si kandidat potencialisht kryesor për të marrë drejtimin e skuadrës. Përveç Edi Rejës, Duka ka kontaktuar edhe me emra si Guidolin, De Kanio, etj. Mbetet që telenovelës “Trajneri i Kombëtares” t’i shihet së shpejti edhe seria e fundit, që është emërimi zyrtar i strategut të ri kuqezi.
