ASNN – Odise Roshi vendos të tërhiqet nga Kombëtarja, FSHF vlerëson kontributin dhe i uron suksese të mëtejshme në karrierën e tij. Organizmi që qeveris futbollin në vend, Federata Shqiptare e Futbollit, është njohur me vendimin e Odise Roshit për t’u tërhequr nga Kombëtarja shqiptare, pas një karriere të gjatë dhe të suksesshme me ngjyrat kuqezi.

Odise Roshi ka dhënë kontribut të jashtëzakonshëm për ekipin Kombëtar, duke dhënë gjithmonë maksimumin e tij në arritjet historike të Shqipërisë në arenën ndërkombëtare. Gjatë gjithë karrierës së tij me kuqezinjtë, Odise Roshi i njohur edhe me nofkën “Raketa” nga tifozët, numëron 71 ndeshje të luajtura dhe 5 gola të shënuar prej tij.

Ai ishte pjesë e skuadrës në kualifikimin historik në “Euro 2016” dhe pjesë e saj në fazë finale të Evropianit. Federata e Futbollit e ka falënderuar Roshin për të gjithë kontributin e dhënë ndër vite me fanellën kuqezi, ku do të kujtohet gjithmonë për pasimet e tij vendimtare për gola, shpejtësinë dhe energjinë e tij në fushë. “I urojmë Odise Roshit suksese të mëtejshme në karrierën e tij”, – përfundon falënderimi i FSHF-së.