ASNN – I dëshpëruar me rezultatin, por i kënaqur me lojën e skuadrës së tij. Pranon se Shqipëria është tashmë jashtë Ligës së Kombeve, por nuk pranon të thotë se është dorëzuar. Në fakt, kjo ishte me pak fjalë gjendja e trajnerit të Kombëtares kuqezi, Kristian Panuçi, pas humbjes me Izraelin të dielën në mbrëmje.
“Më vjen keq për djemtë, bëmë një ndeshje të jashtëzakonshme, – ka thënë ai, duke folur ekskluzivisht për Rrjetin e Radio-Televizionit Shqiptar. – Pësuam një gol nga goditja e portierit, dhe kjo është e rëndë. Edhe më pas morëm një tip autogoli. Të kthehesh me një humbje të tillë, të bën të ndihesh keq.”
I pyetur për rastin e pësimit të golit të parë, edhe vetë trajneri e ka pranuar se është shtangur nga shpejtësi me të cilën rrodhën gjërat, por nuk ngurron të thotë të vërtetën. “Ishte një top i gjatë dhe kur u ktheva pashë që po shkonte tek Hemedi, dhe mbrojtësit po flinin në atë moment, – tha italiani. – Thjesht kemi fjetur.”
Tanimë kreu i stolit kuqezi e ka pranuar me qetësi realitetin e këtij grupi. “Është e vështirë të fitosh 3-0 me skocezët në Shqipëri, dhe pastaj që Skocia të mundë Izraelin, e më pas, prapë do jemi me pikë të barabarta, por Izraeli na mundi këtu 2-0 e ne në shtëpi 1-0 e kështu me radhë. Ndërkohë, ne jemi jashtë.”
Por, a është dorëzuar 45-vjeçari? “Nuk jemi dorëzuar, por duke humbur kështu, bëhet shumë e vështirë”, – ka këmbëngulur italiani. I pyetur në fund nëse Shqipëria ishte më e mirë me Lilajn se Bashan, ai nuk pranoi të zgjidhte. “Nuk më pëlqen që përmendi emra, por këtu në Biir Sheva ka qenë një skuadër e madhe”, – ka përfunduar trajneri i Kombëtares kuqezi, Kristian Panuçi.
