ASNN – Kombëtarja regjistroi sezonin e kaluar një sukses historik në Eliminatoret e Evropianit, sepse siguroi kualifikimin dhe u paraqit mjaft mirë në “Francë 2016”, ku pavarësisht se nuk e kaloi grupin, luajti në mënyrë shumë të mirë dhe entuziaste, duke marrë vëmendjen e shtypit sportiv botëror. Lojtarët rritën “kreditet” e tyre dhe një pjesë siguruan kalimin në skuadra më cilësore gjatë merkatos së verës dhe të janarit.
Por në këtë edicion duket se loja e skuadrës ka rënë, dëshmuar me dy humbjet e fundit, ndaj Spanjës dhe Izraelit, të dyja në fushën e vet, duke treguar se gara për në Botërorin e Rusisë është shumë e vështirë. Sidoqoftë, përpara është një ndeshje mjaft domethënëse për fatet e këtyre Eliminatoreve. Kuqezinjtë do të përballen me Italinë më 24 mars në stadiumin “Renzo Barbera” të Palermos.
Në këtë ndeshje, kuqezinjtë synojnë të marrin rezultat pozitiv, edhe pse kjo në pamje të parë duket e vështirë dhe gati e pamundur, sepse luajmë kundër njërës prej skuadrave më të mira të planetit. Trajneri Xhovani de Biazi po e përgatit këtë ndeshje në të gjitha dimensionet sportive, fillimisht duke ndjekur formën e lojtarëve të tij para se të shpallë listën e të ftuarve.
Natyrisht, Kombëtarja kuqezi bën një lojë kryesisht mbrojtëse dhe De Biazi interesohet vazhdimisht për të perfeksionuar këtë cilësi të lojës, në mënyrë që të marrë maksimumin në rezultate, por përballë Italisë kërkohet më shumë. Portieri Berisha mungon e me shumë gjasë do të luajë djaloshi i talentuar Thomas Strakosha, aktualisht titullar me Lacion.
