ASNN – Është shtylla e mbrojtjes së Kombëtares, por fatkeqësisht Mërgim Mavraj pësoi një dëmtim ditë më parë me skuadrën e tij të Hamburgut dhe me shumë mundësi do të mungojë në një ndeshje tejet të rëndësishme për kuqezinjtë, atë ndaj Italisë më 24 mars.
Megjithatë, Mërgim Mavraj po bën maksimumin që të jetë gati për ndeshjen ndaj Italisë. Mbrojtësi i Kombëtares shqiptare është i dëmtuar, por thotë se po bën gjithçka për t’u kthyer sa më shpejt. Ai e pranon se kjo është një situatë delikate, por po punon për ta kapërcyer atë.
“Periudhë e vështirë pas dëmtimit, në një moment shumë delikat, si për klubin, ashtu edhe për Kombëtaren. Po bëhet maksimumi për rikuperimim por tepër e vështirë për t’u rikthyer në kohë për Kombëtaren”, ka shkruar Mavraj në një postim të shkurtër në profilin e tij në rrjetin social “Facebook”.
Për trajnerin Xhovani De Biazi, mungesa e Mavrajt është një “dhimbje koke” më vetë, duke qenë se në këtë ndeshje eliminatore do të mungojë për shkak kartonësh edhe Gjimshiti, ndërsa Ajeti nuk është në formën e tij më të mirë. Ndeshja ndërmjet Italisë dhe Shqipërisë do të zhvillohet me 24 mars 2017.
