ASNN – Ndryshime të rëndësishme priten në formacionin kuqezi për sfidën me mikpritësit e Evropianit, Francën, pasi trajneri Xhovani De Biazi ndërron 3 nga 11-shja e formacionit bazë që luajti me Zvicrën. Ndryshim i detyruar në qendër të mbrojtjes ku për të plotësuar boshllëkun e krijuar nga kartoni i kuq i Lorik Canës, De Biazi ka votuar Arlind Ajetin, kjo edhe sepse preferon që Kukelin, i cili u paraqit mirë i tërhequr në këtë rol ndaj helvetëve kur Shqipëria mbeti me 10 lojtarë, do ta ketë sërish në “kabinën e regjisë” para qendrës së mbrojtjes.
Ndërkohë, trajneri nuk ndërron asgjë në pjesën tjetër të mbrojtjes me Berishën mes shtyllave, Mavrajn përkrah Ajetit e Hysajn e Agollin nga krahët por për sa i përket mesfushës fiton një vend nga minuta e parë Ledian Memushaj, me Taulant Xhakën që pritet ta nisë nga stoli. Ndryshimi tjetër ka të bëjë me Andi Lilën, futbollisti kavajas do të zërë vendin e Odise Roshit në krahun e djathtë, ndërsa ruajnë pozicionet e tyre Abrashi, mjaft efektiv në mesin e fushës në ndeshjen me Zvicrës, ashtu si dhe Lenjani por edhe Armando Sadiku.
Këtij të fundit, përtej zhgënjimit në dy raste të pastra me Zvicrën, De Biazi pritet t’i besojë sërish vendin e sulmuesit të vetëm. Është ky formacioni i provuar nga trajneri në seancën e fundit stërvitore, 11-shja anti-Francë, natyrisht duke përjashtuar ndonjë të papritur të minutës së fundit. Si një ndër futbollistët e kuotuar për të fituar një vend titullari ndaj gjelave ishte dhe Ergys Kace, ndëshkuesi i Francës në “Elbasan Arena”, por ndoshta ka qenë gjendja fizike e mesfushorit korçar që ka kushtëzuar zgjedhjen e De Biazit.
Kaçe u stërvit i veçuar në seancën e paradites pas dhimbjeve që ndiente në gju, ndërsa pasdite, pas një nxemjeje të zhvilluar individualisht me përgatitësin atletik Alberto Bele u bashkua me grupin. Sidoqoftë, është e kuptueshme që për një ndeshje të një rëndësie madhore trajneri italian i kuqezinjve, kërkon që futbollistët e formacionit të jenë në 100% të formës.
