ASNN – Mediat ndërkombëtare në Evropë në Itali, Gjermani, Francë, Portugali, Danimarkë, Suedi madje dhe në Shtetet e Bashkuara të Amerikës i kanë bërë jehonë kualifikimit historik të Shqipërisë në Evropianin Francë 2016. Ato kanë shkruar në faqet e para për fitoren e kuqezinjve.
Edhe mediat ndërkombëtare i kanë bërë jehonë kualifikimit të Shqipërisë për herë të parë në finalet e një Evropiani. Kështu faqja ndërkombëtare “Yahoo”, shkruan: “Shqipëria kualifikohet për herë të parë në një kampionat Evropian. Ndërsa De Biazi deklaron: Askush nuk mund të qeshë më me Shqipërinë”.
Ndërsa të gjitha gazetat e tjera sportive në Itali kanë shkruar për këtë arritje të kuqezinjve. Në SHBA, “ESPN” nënvizon: “Shqipëria shkruan historinë, pasi mundi Armeninë 3-0 duke siguruar kualifikimin për në “Euro 2016” dhe fitojnë një vend mes kombëtareve më të nderuara të këtij turneu kontinental”.
Në Portugali, e përditshmja “A Bola” shkruan: “Shqipëria mund Armeninë dhe përgatitet për Evropian. Edhe Spanja me të përditshmen “AS” nuk e ka kaluar pa e theksuar kualifikimin e kuqezinjve në Evropianin e Francës. “Shqipëri historike, – shkruan ajo. – Do të luajë për herë të parë në një Evropian, pas fitores me goeladë me Armeninë.”
“Evropiani do t’i hapë dyert një kombëtareje, që deri pak vite më parë ishte mësuar të pësonte goleada, por Xhovani De Biazi, ish-trajneri i Levantes, diti të ngrejë në këmbë një grup solid me kampionë si Etrit Berisha, Elseid Hysaj, Lorik Cana, Ermini Lenjani e Taulant Xhaka”, – shton “AS”.
“Der Shpigel” në Gjermani nënvizon me një fjali kualifikimin historik të Shqipërisë: “Shqipëria në Evropian për herë të parë”. Edhe Serbia me të përditshmen e saj “Kurir” ka shkruar: “Sukses historik. Shqipëria pas fitores ndaj Armenisë është kualifikuar për herë të parë në kampionatin evropian”.
Ndërsa qershia mbi tortë e mediave ndërkombëtare, ishte gazeta suedeze “Express.se” ka shkruar në shqip në krye të faqes së parë: “Urime Shqipëri” për të vazhduar më tej me komentet për kualifikimin historik të Shqipërisë në Evropianin “Francë 2016”.
