ASNN – Mediat ndërkombëtare i kanë bërë jehonë fitores së Shqipërisë të arritur në ndeshjen me Rumaninë, në mbrëmjen e së dielës. Në Francë, në Itali, Angli dhe Spanjë, gazetat më të mëdha sportive kanë publikuar shkrimet e tyre për suksesin e futbollistëve kuqezi në faqet e para. Shqipëria i surprizon të gjithë me fitoren 1-0 ndaj Rumanisë në ndeshjen e fundit në grupin A të fazës finale të Euro 2016.
Një gol i realizuar nga Sadiku dhe një lojë për t’u admiruar u kanë kuqezinjve tri pikët dhe shpresën për kualifikim për në turin e 16-shes së kësaj veprimtarie madhore evropian. Mediat ndërkombëtare kanë vënë në dukje këtë sukses të kombëtares shqiptare dhe trajnerit të saj Xhovani De Biazi. Gazeta më e madhe sportive në Francë, “Francë Futboll” e titullon artikullin e saj “Shqipëria eliminon Rumaninë”.
Ndërsa në brendësi shkruan me detaje se çfarë ndodhi në ndeshjen Shqipëri-Rumani dhe për golin e Sadikut. E përditshmja tjetër franceze “L’Ekip” titullon artikullin: “Shqipëria fiton, Sadiku në histori”. Edhe kjo media publikon në brendësi një artikull të gjatë për ndeshjen e skuadrës kuqezi. Mediat britanike nuk ngurrojnë aspak t’i bëjnë jehonë fitores dhe mundësisë së Shqipërisë për kualifikim për më tej.
“The Guardian” titullon “Shqipëria merr fitore historike” ndërsa për “Daily Mail”, “Goditja me kokë e Sadikut i jep besim Shqipërisë”. E përditshmja prestigjioze sportive “Gazzetta dello Sport” në Itali ka analizuar me detaje punën e trajnerit De Biazi si dhe suksesin e arritur nga kuqezinjtë. Ndërkaq, në Spanjë, prestigjozja “AS” shkruan “Shqipëria arrin fitoren e parë në Evropian”.
Ndërsa “Marca” i bashkohet entuziazmit të kombit shqiptar teksa shpreh në artikull: “Shqipëria arrin fitoren e parë në Evropian”. Edhe mediat serbe i kanë kushtuar rëndësi fitores së Shqipërisë ndaj Rumanisë duke theksuar faktin se mund të vazhdojnë rrugëtimin në Evropian. Gazeta “Blic” shkruan se: “Shqiptarët mund të kalojnë në fazën tjetër, ndërsa rumunët kthehen në shtëpi!”.
Ndërsa “Kurir” shkruan në kryeartikull: “Rumunët kthehen në shtëpi, Sadiku i jep Shqipërisë fitoren historike në Evropian”.
