ASNN – Trajneri i Kombëtares, Xhovani De Biazi, nuk do të ketë në dispozicion dy nga sulmuesit e skuadrës në dispozicion për ndeshjen e radhës në kuadër të Eliminatoreve të Botërorit 2018, atë me Lihtenshtejnin. Rei Manaj është dëmtuar në kavilje dhe sipas mjekëve do të qëndrojë 10 ditë larg fushave të blerta.
Ndërsa Armando Sadiku, i dëmtuar në gju, ndien ende dhimbje, ndaj nuk do të luajë të paktën ndaj Lihtenshtejnit. Kështu, Rei Manaj dhe Armando Sadiku janë dy lojtarët të cilët do t’i mungojnë Kombëtares në ndeshjen me Lihtenshtejnin. 19-vjeçari i kuqezinjve nuk i është bashkuar skuadrës në Vaduz.
Sulmuesi i Peskarës u dëmtua në kavilje në ndeshjen e së shtunës ndaj Kievos në kampionatin italian dhe u detyrua të linte fushën e lojës në minutën e 67-të. Pas kontrolleve mjekësore, u pa se dëmtimi i tij ishte i rëndë. Manaj do të qëndrojë jashtë fushave të lojës të paktën për 10 ditë.
Ndërkohë, dëmtimi i dy javëve më parë i sulmuesit të kuqezinjve në një ndeshje me FC Zyrihun, ka bërë që ai të mos jetë gati për sfidën e së enjtes. Sadiku nuk është stërvitur dje me ekipin, por ka qenë nën kujdesin e mjekëve, të cilët kanë kryer terapi intensive me të.
Ai ndien ende dhimbje në gju ndaj duket i pamundur aktivizimi ndaj Lihtenshtejnit. Në ditët në vijim mjekët do të konfirmojnë nëse sulmuesi do të jetë i gatshëm të luajë të paktën me Spanjën. Por, edhe 7 lojtarë të tjerë kanë zhvilluar stërvitje të diferencuar si Berisha, Agolli, Xhaka, Hysaj, Memushaj, Mavraj dhe Hyka.
Ndoshta trajneri De Biazi ka menduar të mos i angazhojë me seanca të plota stërvitore, pasi të gjithë këta lojtarë kanë luajtur në fundjavë me skuadrat e tyre. Sot kombëtarja do të zhvillojë dy seanca stërvitore, paradite dhe pasdite.
