ASNN – Shqipëria mori një fitore me vlera në Lihtenshtejn që e ngjiti në vendin e parë pas dy takimeve, duke qenë i vetmi ekip me pikë të plota në grup. Rezultati 2-0 nuk u arrit shumë lehtë, edhe për shkak të mënyrës lojës së kundërshtarit, megjithatë protagonistët e sfidës janë të kënaqur. Xhovani De Biazi, ka analizuar fitoren me Lihtenshtejnin, paraqitjen e skuadrës në këtë sfidë si dhe përdorimin e skemës së re, 4-2-3-1, të gjitha këto në një intervistë për Televizionin Shqiptar, menjëherë pas ndeshjes së mbrëmshme në Vaduz.
Trajneri i Kombëtares kuqezi ka mbetur i kënaqur me rezultatin e ndeshjes me Lihtenshtejnin, por jo me paraqitjen e skuadrës. “E thashë që më mjaftonte edhe fitorja 1-0, – tha ai. – Këtu rezultati ishte i vështirë ashtu siç i ndodhi Spanjës, por mund të kishim shënuar edhe më shumë, por u tregua i zoti edhe portieri i tyre. Ishte ndeshje e vështirë, duhet ta luanim në mënyrë të zgjuar dhe me ritmin e duhur dhe besoj se ia dolëm mbanë dhe pse mund të kishim një tjetër rezultat. Duhet ta fitonim me çdo kusht këtë ndeshje dhe duhet të luanim me shumë forca sulmuese.
“Dhe besoj se e bëmë diçka të tillë, – ka vijuar 60-vjeçari. – Ishim sulmues në shumë momente të kësaj sfide dhe shpeshherë u shfaqëm të rrezikshëm. Ku nuk luanim ndërkohë siç e kishim parashikuar ndeshjen, atëherë hasnim vështirësi. Sidoqoftë, jam i kënaqur me atë që dhanë lojtarët në fushë.” Vëmendja tani është te Spanja, që do të jetë prova e zjarrit për Kombëtaren, por për De Biazi llogaritë bëhen në fund. “Sa i përket vendit të parë në grup para Spanjës e Italisë, ndihem si përpara ndeshjes dhe jam i kënaqur për faktin që jemi të parët”, – pohoi ai.
“Kjo, sepse nuk ka ndodhur shpesh herë që Shqipëria të jetë e para në eliminatore, por nga anët e mia thuhet që të vdekurit numërohen në fund të betejës”, – tha trajneri kuqezi, i cili foli edhe për shanset që ka Shqipëria në këto eliminatore, ndërsa theksoi se kuqezinjtë kanë përballë dy rivalë shumë të fortë. “Italia dhe Spanja janë favoritet kryesorë për dy vendet e para, për ne nuk është asnjë ndeshje e favorshme, – këmbënguli ai. – Të jemi në vend të parë është kënaqësi e madhe, por kemi dy rivalë të fortë. Për Spanjën do fillojmë të flasim nesër.”
Trajneri De Biazi la disa titullarë pushim ndaj Lihtenshtejnit, që t’i ruante për takimin me ekipin më të fortë në grup, Spanjën. Taulant Xhaka dhe Ansi Agolli e ndoqën sfidën nga stoli, ndërsa Amir Abrashi luajti vetëm një pjesë. Në takimin me Lihtenshtejnin debutoi Azdren Llullaku.
