Programi 4-vjeçar i Solidaritetit Olimpik 2017-2020 është ndarë në 3 nivele; bursat olimpike dhe përgatitja e sportistëve nga Kliton Muça; menaxhimi dhe aftësimi i Federatave nga Sekretari i Përgjithshëm i KOKSH, Stavri Bello dhe edukimi olimpik nga Eda Çaushi. “Kjo ishte mënyra më e mirë, – thotë Bello, – për shpjegimin e programit të Solidaritetit Olimpik, që në fakt selinë e tij e ka në Lozanë.”
“Ky program është mbështetës për të gjitha sportet, ndërsa do të mund t’iu bëj të ditur se 3 bursa janë përfituar nga 3 skiatorë për përgatitjen e tyre për Lojërat Olimpike Dimërore më 2018-ën, – ka vijuar ai. – Për herë të parë, bursat olimpike për “Tokio 2020” nisin që 3 vjet përpara, ndërsa gjithçka do të zërë fill në shtator. Jo vetëm kaq, por parashikohet kualifikimi i trajnerëve, menaxhimi dhe kualifikimi i kuadrit drejtues, apo krijimi i mundësive për shkëmbimin e eksperiencave në rajon dhe më gjerë.”
“Gjithashtu dhe java olimpike duhet parë disi më gjërë, ndërsa programet e solidaritetit olimpik janë tashmë dhe në Internet, – ka theksuar nr. 2 i organizmit që qeveris lëvizjen olimpike shqiptare. – Nëse Lozana ka 2,000 anëtare, ne kemi 38 Federatat, të cilat do të mund të jenë përfituese të këtyre programeve të solidaritetit Olimpik.” Duke hyrë në detaje për përfitimin e bursave është dhe një kusht i domosdoshëm që sportisti a sportistja, nuk duhet të jetë e dënuar për shkak të përdorimit të substancave të ndaluara.
“Kurset e administratorëve sportivë janë të atilla që janë për të ndihmuar Federatat, – ka sqaruar Bello. – KOKSH-i ka lidhje me shkollën e sportit në Romë, por ama nëse nuk do të kërkojnë Federatat, atëherë nuk kemi se si të aplikojmë, sepse ikin dhe afatet e pjesëmarrjes në seminar. Së paku për një kurs kualifikimi të një Federate të caktuar duhet të jenë 20 persona, 40 % e të cilëve duhet të jenë femra.”
“Përfitimi është që të paktën diploma e kursit të avancuar të menaxherëve sportiv vjen nga Komiteti Olimpik Ndërkombëtar e shërben kudo. Mbi të gjitha duke qenë bashkë në Parkun e ri Olimpik do të kemi mundësi dhe zhvillimin e teknologjisë”, – ka përfunduar Sekretari i Përgjithshëm i Komitetit Olimpik Kombëtar Shqiptar, Stavri Bello.
