Sulmi që presidenti i Komitetit Olimpik Kombëtar Shqiptar, Viron Bezhani, ka bërë ndaj Agjencisë së Shërbimit të Sporteve për neglizhencë në rastin e dëmtimeve të sportistëve, në mënyrë më specifike të Luiza Gegës, nuk është se ka kaluar në heshtje. Drejtori kësaj Agjencie, ish-volejbollisti i njohur i Dinamos dhe i ekipit tonë kombëtar të meshkujve, Bledar Doçi, e ka cilësuar deklaratën e Bezhanit si një teori atje ku mbrojtja më e mirë është sulmi.
“Duhet të dini, – thotë Doçi, – çdo Federatë sportive mbulohet me grant nga shteti për veprimtaritë e saj kombëtare dhe ndërkombëtare mbi bazën e të cilave bën dhe planifikimet për pjesëmarrjen në këto veprimtari. Po kështu dhe Komiteti Olimpik Kombëtar Shqiptar është një institucion i cili merr buxhet për Lojërat Olimpike e organizatorja e pjesëmarrjes në këtë veprimtari është ajo.”
“I them këto sepse nuk është aspak përgjegjësi e Agjencisë së Shërbimit të Sporteve për dëmtimet e sportistët, të cilët nuk kanë ardhur të kontrollohen në mjediset që ne kemi, ndërsa i kemi të gjitha mjetet shto dhe doktorin e fizioterapisten, – ka vijuar ai. Në rastin e doktorit Ostreni dhe të fizioterapistet Haxholli kërkesa nga Komiteti Olimpik Kombëtar Shqiptar i nisur më 24 korrik është protokolluar tek ne më 27 korrik.”
“Sa për dijeni ne nuk mund t’i ndjekim sportistët kur janë të pa grumbulluar, pasi më 2008-ën kanë qenë në Linzë për Pekinin dhe të grupuar vinin tek ne për t’u kontrolluar nga ana mjekësore, – ka theksuar pinjolli i një dinastie volejbolli në Shqipëri. – Jo vetëm kaq, por për Londër 2012 kanë qenë të grumbulluar në hotel “Rogner” dhe janë kontrolluar në grup.”
“Edhe në rastin e Luizës u vendos fizioterapistja, sepse e donte femër, dhe në momentin e dëmtimit në Korçë, edhe pse i është kërkuar që të shkonte atje, nuk ka dashur, – ka thënë Doçi. – Sot është duke bërë dy seanca në ditë fizioterapie në mjediset e laboratoret mjekësore të këtij institucioni. Pra në të tilla kushte nuk mund të sulmohet Agjencia e Shërbimit të Sporteve.
“Sidomos kur kjo bëhet për të mbuluar defektet e veta në organizimin e delegacionit olimpik shqiptar Komiteti Olimpik Kombëtar Shqiptar. Ne kemi qenë të gatshëm në çdo moment, por s’ka ardhur askush për kontroll”, – ka përfunduar drejtori i Agjencisë së Shërbimit të Sporteve, Bledar Doçi.
