Komiteti Drejtues i Komitetit Olimpik Kombëtar Shqiptar, i mbledhur përpara dy javësh, më saktë më 11 shkurt, ka mbështetur kërkesat e disa federatave sportive për kurset e kualifikimit të trajnerëve. Më saktë ka qenë presidenti i Komitetit Olimpik Kombëtar Shqiptar, Viron Bezhani, i cili përpara Komitetit Drejtues ka paraqitur kërkesat e disa institucioneve sportive, të cilat kanë mbërritur në institucionin më të lartë të olimpizmit shqiptar për mbështetje financiare të rritjes së nivelit të trajnerëve.
Dhe për rrjedhojë ky ka qenë edhe qëllimi i Komitetit Olimpik Kombëtar Shqiptar rritja e kualifikimit të trajnerëve, si dhe synimi për përmirësimin e burimeve njerëzore pranë organizatave sportive. E ato që kanë përfituar nga mbështetja e Komitetit Olimpik Kombëtar Shqiptar për kurset e kualifikimit të trajnerëve janë Federata Shqiptare e Karatesë, Xhudos dhe Raftingut.
Edhe më parë, po me mbështetjen e Komitetit Olimpik Kombëtar Shqiptar, janë bërë kurse kualifikimi për trajnerët e peshëngritjes, boksit, atletikës, çiklizmit, xhudos dhe sporteve të tjera. Parë kështu duket se gjithnjë trajnerët shqiptar, jo vetëm të sporteve individuale, por dhe atyre kolektive kanë nevojë të vazhdueshme për të marrë të rejat. Ndaj dhe KOKSH ua ofron këtë mundësi kualifikimi nëpërmjet financimit të saj dhe mbështetjes së Solidaritetit Olimpik.