I pari i Komitetit Olimpik Kombëtar Shqiptar: “Ata që kanë hedhur baltë mbi institucionin tonë do të përgjigjet ligjërisht”. Iku dhe një Olimpiadë pa medalje dhe si gjithmonë prapa la vetëm debate dhe si gjithmonë edhe kësaj radhe ato nuk fillojnë në Tiranë. Presidenti i Komitetit Olimpik Kombëtar Shqiptar, Viron Bezhani, në një bisedë për Televizionin “Top-Channel” të martën nuk jep emra, por deklaron se gjithçka u bë për interesa të personave brenda ekipit olimpik, të cilët kërkojnë kokën dhe postin e tij.

“Për mendimin tim, ishin të shtyra, – ka pohuar ai. – Ata mendojnë se është koha e fushatës. Ata që e kanë shtyrë një gjë të tillë mendojnë se është koha e fushatës. Deri vitin tjetër, që do të bëhen zgjedhjet, në tetor dhe nëntor ka çdo njeri mundësitë e veta që të shpalosë programin.” I pari i Komitetit Olimpik Kombëtar Shqiptar pohon se do të ndjekë rrugën ligjore për cilindo që ka shpifur për institucionin që ai drejton, përfshi këtu edhe të atin e notarit, Sidni Hoxha.

“Unë jam President i një institucioni dhe duhet ta mbroj institucionin në të gjitha mënyrat, – ka thënë Bezhani. – Edhe në rastin e Sidnit do të shihni që janë të gjitha dokumentacionet e që është krejt ndryshe nga ajo që është dhënë. Ata që kanë hedhur baltë mbi institucionin tonë do të përgjigjet ligjërisht.” Bezhani thekson se Komiteti Olimpik u ka shpërndarë nga 8 mijë $ të gjitha federatave, sportistët e të cilëve morën pjesë në “Rio 2016”.

Për mungesën e Evangjeli Velit në parakalim, ai ia la përgjegjësinë drejtuesve të delegacionit olimpik. “Ne nuk mund të bënim të pamundurën të mundur, – ka deklaruar Presidenti i KOKSH, Viron Bezhani. – Ne nuk kishim koha as ta takonim Evangjelinë. Evangjelia mund të parakalonte, mund të gjehej mundësia, por atë e vendosin drejtuesit aty.”