Në KOKSH mohojnë të ketë kufizime për pjesëmarrjen e garuesve në këtë veprimtari. Bezhani qartëson: “Ndërrimi i emrave të garuesve do të thotë pagesa nga vetë Federatat”. “Sot është afati i fundit i dorëzimit të emrave të sportistëve për të marrë pjesë në Lojërat Olimpike Evropiane në Baku”. Ky është qartësimi që ka bërë presidenti i Komitetit Olimpik Kombëtar Shqiptar, Viron Bezhani, që mes të tjerave ka shpjeguar se nuk asnjë urdhër nga institucioni që ai drejton, apo dhe organizatorët e aktivitetit, për kufizimin e moshave të sportistëve pjesëmarrës.
“Mundet të ketë ndonjë rregull nga Federatat Ndërkombëtare, por kurrsesi të ketë kufizime të moshave, të cilat në një farë mënyre kanë limit dhe kur merret pjesë në Botëror, apo në Evropian, – ka sqaruar ai. – Ne nuk i kemi dhënë një udhëzim të tillë Federatave, përkundrazi po ua bëjmë të qartë edhe nëpërmjet jush se ndërrimi i emrave të sportistëve pjesëmarrës në ndryshim me atë që do të deklarojnë në KOKSH do të thotë se kostot e udhëtimit të atyre sportistëve do t’i paguajnë vetë. Të gjitha Federatat pjesëmarrëse në këto Lojëra do të duhet t’i dorëzojnë sot emra, sepse nuk ka më kohë.”
“Aq më tepër që dita-ditës rritet dhe kostoja e biletave të udhëtimit drejt Bakusë, ndërsa nuk ka më kohë për emrat. Pra sot të gjitha Federatat duhet të veprojnë”, – ka thënë Bezhani. I pari i olimpizmit shqiptar ka bërë të ditur se shumë shpejt do të ketë dhe një takim me federatat sportive për të sqaruar më pas dhe të gjitha detajet e pjesëmarrjes në Lojërat e para Evropiane në Baku, që do të mbahen në kryeqytetin azer, nga data 12, deri më 28 qershor 2015.
Nuk duhet harruar që sivjet janë tri veprimtari ndërkombëtare nën kujdesin e Komitetit Olimpik Kombëtar Shqiptar, ndërsa bëhet fjalë për Festivalin Olimpik Evropian Rinor në Tbilisi të Gjeorgjisë, apo dhe Lojërat e Para Mesdhetare të Plazhit në Peskara. Kështu që impenjimi i sportit shqiptar shto këtu me aktin final të pjesëmarrjes të sportistëve me normë kualifikimi në Lojërat Olimpike të vitit të ardhshëm, “Rio de Zhaneiro 2016”, është shumë më i madh.
