ASNN – Flet Jengu, medalistja e parë olimpike kineze. Ajo solli medaljet e para të arta Olimpike për Kinën dhe konsiderohet si një nga patinatoret më të mira, të të gjitha kohërave, të disiplinës së patinazhit të shpejtësisë në distanca të shkurtëra. Por pak e dinë se çfarë ka bërë Jeng Jengu për të arritur majën e suksesit në këtë sport. Tani 42-vjeçarja po shfrytëzon kohën për të ndihmuar Kinën, tashmë një forcë në Olimpiadën Verore, që ta përsërisë këtë sukses në borë dhe akull.
Nuk ka kohë për të humbur, sepse Pekini pret Olimpiadën Dimërore të 2022-shit dhe turpërimi në shtëpi është i paimagjinueshëm. “Sigurisht që sportet dimërore nuk janë shumë të suksesshme në Kinë”, – tha Yang për Agjencinë Franceze të Lajmeve (AFP) në Shangai, ku bora dhe akulli janë një gjë e rrallë dhe vera shumë e nxehtë. – Kanë qenë vetëm dy provinca në verilindje të Kinës, të cilat praktikojnë sportet dimërore. Por Olimpiada nuk është vetëm Pekini, është e gjithë Kina.”
Jengu u tërhoq nga garimi, pas Olimpiadës së Torinos të vitit 2006. Ajo ka realizuar një ëndërr 10-vjeçare me instalimin e përkohshëm të një sheshi prej akulli në Shangai në natyrë, me Kulla Orientale që shërbejnë si një sfond mahnitës. Mbështetur nga investimet private, ky është sheshi i tretë në Shanghai, duke nënvizuar angazhimin e saj për të gjeneruar interes në sportet e akullit midis një brezi më të gjerë të popullsisë prej 1.4 miliardë të Kinës.
Jengu, e cila fitoi medaljen e artë në 500 metra dhe 1,000 metra në Lojërat e Sollt Lejk Sitit në vitin 2002, ka më shumë se 1,000 atletë që stërviten në hokej mbi akull, në patinazh artistik apo në garat e patinazhit të shpejtësisë. “Në vitin 2022 qëllimi ynë është të marrim pjesë në të gjitha ngjarjet disiplinat e akullit, – tha ajo. – Duam më shumë medalje ari. – Unë kam 23 vjet që punoj në akull”, – përfundoi Jengu.
Përreth saj, fëmijët fluturojnë dhe rrëshqasin në sheshin e pishinës publike në natyrë, e cila u frymëzua nga ajo në Qendrën “Rokfeller” të Nju Jorkut.
