ASNN – Kastrioti trondit Flamurtarin dhe kërcënon rivalët e mbijetesës, largohet nga vendi i fundit. Në anën tjetër, Flamurtari po konfirmohet si skuadër e papjekur për të bërë surprizën e madhe. Pavarësisht pretendimeve të fillimsezonit se ka skuadër për titull, pas 15 javësh garë mund të pranohet se Flamurtari nuk është për titull dhe kjo lidhet me mungesën e qëndrueshmërisë.

Kjo skuadër e ka të vështirë të fitojë jashtë Vlorës dhe ky është problem serioz në një kampionat me 4 faza dhe me duele të shumta direkte. Të dielën vlonjatët u mundën në Krujë nga Kastrioti, me rezultatin 1-0. Fitoi Kastrioti i trajnerit veteran Stavri Nica përballë kuqezinjve vlonjatë që drejtohen nga fitimtari i sprovuar Ilir Daja. Ishte një gol ai që bëri diferencën në këtë ndeshje, pikërisht në minutën e 32-të nga Henri.

Një goditje nga këndi për Kastriotin sjell harkimin e topit në zonë. Më pas topi devijohet me kokë nga një mbrojtës, por përfundon në këmbët e Henrit, i cili gjuan fluturimthi me të majtën dhe shënon një gol shumë të bukur. Edhe pse Flamurtari u përpoq ta ndryshonte rrjedhën e ndeshjes në pjesën e dytë, duke nxitur aksione sulmuese në qendër dhe nga krahët, nuk ia doli të finalizojë. Për pasojë, doli i humbur nga Kruja.

Në kampin tjetër, Kastrioti mori tri pikë me vlerë dhe tani shkon në 10 pikë, duke parakaluar Kamzën për herë të parë që nga fillimi i kampionatit. Me 10 pikë në renditje, Kastrioti kërcënon tani drejtpërdrejt Tiranën, që ka 11 pikë, dhe Luftëtarin, që ka 13 pikë. Është plotësisht në garën e mbijetesës dhe me kundërshtarë të tillë që po vuajnë mund të prodhojë surprizën e madhe.

Sa i takon Flamurtarit, ekipi vlonjat mbetet në vend të 6-të me 22 pikë, plot 12 pikë më pak se Partizani kryesues. Me pak fjalë, Flamurtari po largohet gjithnjë e më shumë nga objektivat e tij.

Kategoria Superiore

Java e 15-të

Të premten, 30 nëntor 2018:

Partizani – Tirana                 2-1

Të shtunën, 1 dhjetor 2018:

Luftëtari – Kukësi                  0-1

Skënderbeu – Teuta                        0-1

Të dielën, 2 dhjetor 2018:

Laçi – Kamza                         0-0

Kastrioti – Flamurtari            1-0

Renditja

Nr. Skuadra               Pikë

1. Partizani 34
2. Skënderbeu 30
3. Teuta 28
4. Kukësi 27
5. Laçi 25
6. Flamurtari 22
7. Luftëtari 13
8. Tirana 11
9. Kastrioti 10
10. Kamza 9