ASNN – Kastrioti bën surprizën e madhe, zhyt Kamzën në fund dhe shkarkon trajnerin Gjoka. Trajneri Ernest Gjoka rezulton i pafat edhe këtë edicion të Kategorisë Superiore. një vit më parë ai mori Vllazninë në kushte të vështira dhe siç dihet skuadra nuk iu përgjigj e ra nga kategoria. Këtë vit Gjoka nuk priti më të vinte fundi, pasi disfata e sotme me Kastriotin ishte e papranueshme për trajnerin, që u dorëhoq, duke e lënë ekipin në krizë, ashtu siç ka qenë Kamza gjatë javëve të fundit.

Ndeshja ishte e barabartë në tërësinë e elementëve të saj, por diferencën me gol në fund të ndeshjes e bëri skuadra krutane. Kamza kishte shansin ta fitonte këtë duel direkt të fundtabelës, por ndodhi që e humbi dhe skuadra e periferisë së kryeqytetit u zhyt në fund të renditjes, me vetëm 16 pikë, ndërsa Kastrioti me fitoren e sotme ngjitet i parafundit me 19 pikë. E habitshme por e vërtetë, nën drejtimin e trajnerit Bledar Devolli, Kastrioti ka marrë 3 fitore në 4 ndeshjet e fundit.

Diçka e pazakontë për një skuadër që kaq pikë nuk i kishte marrë në dy fazat e para të kampionatit. Fatet e ndeshjes u vendosën në sekondën e fundit, pikërisht në minutën e 3-të shtesë të saj, kur Ersil Ymeraj shënoi golin e fitores brenda në Kamzë, duke i dhënë Kastriotit 3 pikë me mjaft vlerë në rrugëtimin e mbijetesës. Madje krutanët tani janë vetëm 3 pikë pas Luftëtarit dhe 6 pikë pas Tiranës. Gara e mbijetesës është më e hapur se kurrë dhe për krutanët kjo periudhë është e artë.

Sepse janë ndër ekipet me ecurinë më të mrekullueshme në garë, një ecuri e denjë për kryesuesit e jo për një ekip që lufton t’i ikë fundit. Sa i takon Kamzës, me humbjen e sotme mbetet në vend të fundit me 16 pikë, skuadra më e rrezikuar për të rënë nga kategoria, ndërsa ka mbetur së fundmi dhe pa trajner, pasi Ernest Gjoka dha dorëheqjen dhe klubit i duhet të gjejë tani një trajner ekspert për mbijetesën. Rivali i Gjokës, Bledar Devolli, jo vetëm mori 3 pikë të vyera, por i dha një “leksion” të fortë Kamzës që e kishte shkarkuar pas 5 javëve të para në kampionat.

Kategoria Superiore

Java e 22-të

Të premten, 15 shkurt 2019:

Teuta – Kukësi                      2-1

Të dielën, 17 shkurt 2019:

Kamza – Kastrioti                  0-1

Flamurtari – Skënderbeu    2-0

Tirana – Luftëtari                   1-1

Laçi – Partizani                     1-0

Renditja

Nr.       Skuadra         N.        F.         B.        H.        Gsh-Gp          Pikë

1. Partizani        22        14        4            4        23-10              46
2. Teuta              22        10        9            3        28-16              39
3. Kukësi            22        11        5            6        21-13              38
4. Laçi                 22          9        7            6        18-17              34
5. Skënderbeu  22        10        3            9        23-19              33
6. Flamurtari      22          9        6            7        19-15              33
7. Tirana             22          6        7            9        26-24              25
8. Luftëtari         22          6        4          12        19-27              22
9. Kastrioti          22          6        1          15        19-39              19
10. Kamza 22          4        4          14        10-26              16