Testimi i brezave në sportin e karatesë ka mbledhur tre ekipe bashkë në një ambient në Kamëz. Bëhet fjalë për “Balkan Shitokai Karate” me trajner Rolando Mracaj dhe president Evangelos Lauris, “Kamza Karate” dhe “Lezha Karate”. Por jo vetëm kaq, testimin e brezave dje e kanë vlerësuar dhe drejtuesit më të lartë të Federatës Shqiptare të Karatesë. Sepse kanë qenë prezent presidenti i Federatës Shqiptare të Karatesë, Petrit Baba, drejtori teknik Ramiz Ismailgecaj, si dhe anëtarët e Komitetit Drejtues, Florian Muço, Luftar Kurti dhe Dritan Sula.
Dhe për rreth tre orë, fëmijët e të gjitha moshave kanë demonstruar teknikën bazë të karatesë, apo ato që kanë mësuar deri më tani, pas së cilës ka ardhur dhe marrja e brezave të rinj. Që nga të bardhët e deri tek kafe sipas gradave që karateja ka. Sigurisht që për arsye të kohës, por dhe numrit të madh të fëmijëve të të tre skuadrave, kanë qenë mbi 40 të testuar, gjithçka është bërë shpejt. Diplomat, së bashku me librezat, apo dhe brezat përkatës, janë dorëzuar nga presidenti i Federatës Shqiptare të Karatesë, Petrit Baba.
Në mbyllje të ceremonisë, Baba do të deklaronte: “Të nderuar fëmijët, që sot jeni e ardhmja e karatesë në Shqipëri, të nderuar prindër që sillni këta fëmijë për të m’u marrë me këtë sport kaq të bukur e të fort, ju përshëndes. Është risi për sportin e karatesë, por dhe hera e parë që në një testim të brezave mblidhen tre ekipe bashkë. Unë shpresoj që bashkëpunimi të vazhdojë, ashtu sikurse ne një testim të tillë do ta bëjmë dhe në vende të tjera. Por mbi të gjitha shpresoj që këta fëmijë të vazhdojnë karatenë për të kaluar në nivele të tjera.”
“Është sport që të zhvillon mendjen, të bën të zgjuara, por dhe të vendosur, – ka vijuar ai. – Nuk më mbetet gjë tjetër veçse t’i uroj suksese dhe në mënyrë të veçantë trajnerëve për këta sportistë që stërvitin”. Ndërkohë një përshëndetje e veçantë ka ardhur nga presidenti i “Balkan Shitokai Karate”, Evangelos Lauris. “I falënderoj të gjithë për pjesëmarrjen, – ka thënë ai. – Sigurisht që nuk ka qenë një testim i mirëfilltë, sepse një i tillë do orë të tëra. Por gjithsesi shpresoj që bashkëpunimi mes grupeve të jetë dhe në vazhdim. Kjo është një risi që do ta vazhdojmë dhe më tej, ndërsa të gjithë duhen përgëzuar.”
“Ne ishim të lehtë në vlerësimet tona, sepse gabimet janë pjesë e njerëzve. Viti i ri është në prag dhe më pas shpresojmë që të kemi dhe të tjera arritje në karate”, – ka thënë Lauris, ndërsa në fund është bërë dhe fotografia e përbashkët.
