Nga data 3, deri më 9 nëntor në Bremen të Gjermanisë është zhvilluar Kampionati i 22-të Botëror i Të Rriturve në karate, atje ku ka marrë pjesë dhe Shqipëria, e cila është përfaqësuar me Orges Arifin (pesha -60 kg), Xhino Tolin (pesha -67 kg), Alvin Karaqin (pesha -84 kg) dhe Herolind Nishevcin (pesha +84 kg). Delegacioni është shoqëruar nga presidenti i Federatës Shqiptare të Karatesë, Petrit Baba, kurse trajneri i kombëtares ka qenë Parid Dule.
Ndërkohë presidenti Baba ka qenë pjesëmarrës dhe në Kongresin Botëror, atje ku është biseduar me homologët për më shumë bashkëpunim reciprok për zhvillimin e karatesë në vendin tonë. Sakaq trajneri Parid Dule ka marrë dhe licencën ndërkombëtare për sezonin 2014-2017. Duke u ndalur tek sportistët tanë, Karaqi, i cili ka fituar me kundërshtarin nga Irlanda e Veriut, 4-3 dhe ka humbur me atë të Britanisë së Madhe, 5-7, është skualifikuar që në fazën eliminatore.
Figurën më të mirë e ka bërë Herolind Nishevci, i cili ka zënë vendin e 5-të në peshën e tij. Nishevci ka marrë katër fitore, që janë 1-0 me Grinjeviçin e Bjellorusisë, 2-1 me Minën e Ekuadorit, 1-0 me Pabon e Estonisë dhe 3-1 me Shepard të Holandës. Por është mundur 0-7 nga turku Erkan. Në të njëjtën kohë Xhino Toli ka marrë dy fitore, 6-0 me Kaidaralin e Taxhikistanit dhe 2-0 me afrikanojugorin Bundesjan. Por është mundur më pas 2-3 nga ukrainasi Kakula.
Po dy fitore dhe një humbje ka shënuar dhe Arifi, i cili ka fituar dy herë 2-1 me Shaluan të Katarit dhe Rendon të Kolumbisë, ndërsa është mundur 0-2 me iranianin Zehde Amir Mahdi. Përfundimisht Nishevci ka bërë figurën më të mirë të karateistëve shqiptar në Botëror, ndërsa ka qenë fare pranë medaljes së bronztë.
