ASNN – Skuadra vendëse është refuzuar nga forcat e rendit të tre komisariateve dhe tani pritet vendimi i FSHF-së. Edhe në ndeshjen e Kategorisë së Parë, Sopoti-Pogradeci, blutë kanë ardhur me 30 minuta vonesë. Ndeshja Domosdova-Olimpik nuk është zhvilluar, ndërsa forcat e rendit e komisariatit të Librazhdit dhe të Prrenjasit nuk e kanë marrë përsipër mbarëvajtjen e këtij takimi.
Edhe pse janë paraqitur të dyja skuadrat, gjyqtarët e ndeshjes me kryesor, Erald Demiraj nga Pogradeci, delegati i Federatës Shqiptare të Futbollit, Sulejman Demollari, si dhe vëzhguesi Arben Nasse, ndeshja nuk është luajtur. Është plotësuar dhe protokolli i ndeshjes me formacionet titullare dhe rezervat, por mosardhja e forcave të rendit nga Prrenjasi dhe Librazhdit nuk janë dukur.
Në momentin që pritej të fillonte ndeshja asnjë lojtar nuk u pa në fushë, sepse forcat e policisë nuk ndodheshin në stadium. Në fakt edhe pse ishte thënë se do të luhej në Prrenjas, kjo ndeshje përsëri është zhvendosur në stadiumin “Nexhip Trungu”, atje ku janë zhvilluar shumë takime të Kategorisë së Parë, të Dytë, jo vetëm për kampionat, por dhe për Kupën e Shqipërisë.
Nuk dihet arsyeja e moszhvillimit të kësaj ndeshjeje dhe e refuzimit të policisë së Cërrikut, e cila në fakt dhe në ndeshjen e së shtunës mes Sopotit dhe Pogradecit ka mbërritur me 30 minuta vonesë. Trajneri i Domosdovës, Lulëzim Rira, është shprehur se nuk e ka të qartë pse nuk u përkrah nga policia kjo ndeshje. Dhe në momentin e refuzimit të policisë së Cërrikut, Rira ka telefonuar edhe komisariatin e Librazhdit dhe të Prrenjasit, por edhe këta të fundit kanë refuzuar.
Nuk dihet se çfarë do të vendoset për këtë ndeshje të anuluar nga Komisioni i Disiplinës në FSHF, por sipas të gjitha gjasave Domosdova nuk ka luajtur dje në Cërrik edhe sepse nuk ka bërë pagesën ndaj “Nexhip Trungut”.
