ASNN – Ka qenë një ndeshje që premtoi shumë që në nisje të saj, por që nuk arriti të dhuronte më shumë se dy gola, nga një për secilën skuadër, duke e lënë gjithçka të hapur sa i përket ndeshjes së kthimit, ku sidoqoftë durrsakët do të shkojnë duke marrë vete golin e shënuar në fushë të huaj. Kjo është me pak fjalë përmbledhja e përballjes së parë midis Kamzës dhe Teutës, të zhvilluar të mërkurën në Stadiumin “Fuat Toptani” dhe të vlefshme për turin e 16-shes së Kupës së Shqipërisë.

Në fakt, nuk mund të kishte nisur më mirë kjo sfidë për vendasit, të cilët ende pa u mbushur një minutë lojë, kanë gjetur golin, me anë të Rezit. Goli i ka ngrohur tifozët vendas të pranishëm në stadium, por nuk i ka trembur miqtë, që sidoqoftë do ta zhvendosin lojën në fushën kundërshtare, duke e synuar gjithnjë e më tepër portën kundërshtare. Dhe do të jetë ganezi i bregdetarëve, Amadu Latif, ai që do të mposhtë Gjonikajn, duke rikthyer barazpeshën në lojë pas një gjysmë ore.

Ndonëse boshnjaku Anel Dediç do të  humbasë një rast të mirë për shënim në minutën e 40-të, pjesa e parë do të mbyllet me rrjeta të paprekura. Në pjesën e dytë, do të jenë miqtë ata që do të kenë raste më të mira për shënim, por gardiani i portës vendase, Gjonikaj, do të jetë në lartësinë e duhur në një numër rastesh, duke mos e lejuar prekjen e rrjetës së portës së tij. Mbyllet kështu 1-1 kjo sfidë e parë midis Kamzës dhe Teutës, ndërsa gjithça sa i përket skuadrës që do të shkojë në çerekfinale do të vendoset në ndeshjet e kthimit, ku bregdetarët shkojnë më të favorizuar