ASNN – 9 fitore në 9 javë të këtij sezoni. Ky është bilanci mbresëlënës i Kamzës, skuadrës e cila pretendon rikthimin në Kategorinë Superiore sezonin e ardhshëm dhe sot ka mundur minimalisht Burrelin. Kjo ndeshje u soll për sportdashësit drejtpërdrejt nga Rrjeti i Radio-Televizionit Shqiptar, i cili do të sjellë edhe të hënën takimin e fundit të kësaj jave të Kategorisë së Parë, atë Apolonia-Bylis.
Kategoria e Parë e Kampionatit Kombëtar të Futbollit, e cila e ka nisur të premten pasdreke javën e saj të 9-të me takimin midis Pogradecit dhe Lushnjës, që u mbyll në barazim 3-3, i ka luajtur të shtunën 3 takimet e tjera të kësaj jave në grupin B, si dhe të gjitha takimet e grupit A. Dhe Rrjeti i Radio-Televizionit Shqiptar ka sjellë për sportdashësit drejtpërdrejt dhe ekskluzivisht njërin prej tyre, atë të orës 14:00 midis Kamzës dhe Burrelit.
Kjo ndeshje, që ishte e vlefshme për grupin B është vendosur nga një gol i shënuar nga vendasit në mesin e pjesës së parë. Ermir Rezi e ka kaluar skuadrën vendase në epërsi në minutën e 25-të, por Kamza do ta mbyllë pjesën e parë me 10 lojtarë, pasi braziliani Leonardo merr kartonin e dytë të verdhë dhe del nga loja me karton të kuq. Pavarsisht inferioritetit numerik, Kamza do ta dominojë edhe pjesën e dytë, duke qenë edhe pranë një goli të dytë në minutën e 56-të.
Megjithatë, mbyllet me fitoren 1-0 të Kamzës kjo përballje dhe skuadra e trajnerit Bledar Devolli kryeson e shkëputur në kuotën e 27 pikëve, pas 9 fitoreve në po aq javë të këtij sezoni. Ndërkohë, java e 9-të e Kategorisë së Parë të Kampionatit Kombëtar të Futbollit mbyllet të hënën, me takimin e fundit të grupit B, atë që nis në ora 14:00, midis Apolonisë dhe Bylisit. Në grupin B, Lushnja kryeson e shkëputur renditjen, tanimë në kuotën e 23 pikëve.
