ASNN – Në Kamzë, aty ku skuadra e Kukësit e kishte kërkuar me ngulm të luante në stadiumin e kësaj qyteze, pësoi një humbje që dhemb shumë për ekipin dhe trajnerin Armando Cungu, si dhe objektivat e tyre. Verilindorët u mposhtën nga Flamurtari 2-1. Për vlonjatët ishte një ndeshje e madhe në një ditë të madhe. Ata shënuan dy gola që në pjesën e parë, duke shtruar “trasenë” për suksesin me vlerë trepikësh.

Franc Veliu në minutën e 39-të dhe Danilo Alvesh në minutën e 44-t, i dhanë ekipit të Ilir Dajës epërsinë dhe e bënë të shkonte në pushimin e ndeshjes me një epërsi psikologjike të padiskutueshme. Në fillimin e pjesës së dytë, trajneri i Kukësit Armand Cungu bën ndërhyrje në formacion dhe i jep përparësi sulmit. Shënon menjëherë Shpehar, që në minutën e 49-të dhe e rihap ndeshjen,.

Një gol që i ka dhënë Kukësit shpresë për përmbysje. Por Flamurtari u mbrojt në mënyrë të shkëlqyer, duke fituar në fund 2-1 dhe duke marrë një 3-pikësh që e ngjit në kuotën e 18 pikëve, po aq sa Teuta por me golavarazh më të mirë. Edhe Flamurtari fitoi shumë nga kjo javë.

Kjo sepse u bën presion kryesuesve, Skënderbeut e Partizanit, që janë përkatësisht 5 dhe 4 pikë përpara, por sidomos Kukësit të vendit të tretë që ka 19 pikë, pra një pikë më shumë se durrsakët e vlonjatët. Sot do të luhen ndeshjet e tjera të javës së 11-të, ku spikat në veçanti dueli derbi mes Kamzës dhe Partizanit.

Kategoria Superiore

Java e 11-të

Të premten:

Teuta – Tirana                       2-1

Kukësi – Flamurtari              1-2

Të shtunën:

Luftëtari – Laçi                       (14:00)

Skënderbeu – Kastrioti        (17:00)

Kamza – Partizani                (17:00)

Renditja:

Nr.       Skuadrat        Pikë

1. Skënderbeu  23
2. Partizani        22
3. Kukësi            19
4. Flamurtari      18
5. Teuta              18
6. Laçi                 16
7. Tirana               9
8. Luftëtari           9
9. Kamza              8
10. Kastrioti   4