ASNN – Partizani ka vuajtur, por ia ka dalë të marrë një fitore minimale, por mjaft të vyer në Kamzë përballë skuadrës vendase, në takimin e vlefshëm për javën e dytë të Kategorisë Superiore. Në fakt, minutat e para nisin më të mira për vendasit, por në minutën e 3-të, Plaku nuk arrin të përfitojë nga largimi i gabuar i topit nga gardiani i kuq, Alban Hoxha në të 3-tën.
4 minuta më pas, Bonani depërton bukur nga e majta, fut një top në qendër, për Roloviçin, por ndërhyn në mënyrë vendimtare Atanda. Në minutën e 13-të vjen një rast i shkëlqyer për vendasit. Plaku përfiton nga rrëzimi i Ibrahimit dhe depërton nga e majta, e dërgon topin në zonë për Roloviçin, i cili shumë pranë vijës fatale gabon duke goditur jashtë.
Më pas loja do të bjerë në monotoni, dhe vetëm 5 minuta para fundit të pjesës së parë, Telushi provon me një gjuatje të rrezikshme nga larg dhe topi devijohet nga portieri Avdyli për një goditje këndi. Një mundësi e mirë për të kuqtë është edhe ajo e Malës në minutën e 43-të, por në krahun tjetër, skuadra e Kamzës fiton një 11-metërsh, pas një pengimi në zonë të Sebino Plakut nga Alban Hoxha. Gjyqtari Olsi Sokoli nuk ka dyshime.
Por Plaku gabon nga pika e bardhë dhe Hoxha e mban të paprekur rrjetën e portës së tij. Pjesa e dytë do të nisë e qetë dhe vetëm në të 54-tën, Hila bën një ndërhyrje vendimtare, duke larguar topin jashtë e duke ndalur Kamzën. 5 minuta më pas, ka një goditje dënimi për Partizanin, harkon Trashi brenda zonës, por grushton portieri Avdyli duke larguar rrezikun.
Janë minuta të mira për Partizanin dhe në të 64-tën, Progni del i vetëm përballe Avdylit dhe gjuan, por ky i fundit bën heroin duke i mohuar golin. Por goli do të vijë 3 minuta më pas, pas një ekzekutimi të shkëlqyer nga larg të të një goditjeje të lirë nga ana e Bruno Telushit. Kamza do të mundohet të reagojë, por del zbuluar në prapavijë dhe në të 82-tën minutë, vjen i dyti rast në kë ndeshje për Prognin.
Por sërish vendimtar është portieri vendase, i cili e ka ndalur sulmuesin e Partizanit, që hyri në zonë dhe ka goditur në rënie e sipër. Partizani i administron minutat e mbetura dhe ato shtesë dhe merr 3 pikë në Kamzë.
