ASNN – Këtë të diel u luajtën ndeshjet e fundit të javës së 20-të të Kategorisë Superiore, të cilat prodhuan të papritura dhe emocione jo të pakta. Natyrisht, fitorja e Partizanit ndaj Kamzës nuk është as surprizë e as spektakolare, por fitorja e Luftëtarit në Kurbin përballë Laçit është jo vetëm surprizë, por edhe e çuditshme po të mendohet situata që gëzojnë dy skuadrat në renditje dhe gjendjen e tyre tekniko-taktike. Kështu, gjirokastritët dhurojnë befasinë më të bukur të javës së 20-të, pasi mposhtën brenda në fushën e Kurbinit ekipin e Lacit me rezultatin 2-0.

Një javë më parë, gjirokastritët ishin mundur në fushën e tyre nga Kastrioti i vendit të fundit 5-1, një disfatë që solli edhe dorëheqjen e trajnerit Gentjan Mezani, por në të njëjtën kohë surprizë edhe vetë disfata e kurbinasve në fushën e tyre këtë të diel, kur një javë më parë nuk ishin carë dot as nga Kukësi që ka pretendime titulli. Sidoqoftë, Luftëtari fiton dhe merr 3 pikë që e afrojnë me Tiranën e vendit të 7-të (tashmë vetëm një pikë larg, 21-20). Kjo ishte një përballje ku lojën e bëri Laçi dhe fitoren e mori Luftëtari.

Të dy golat u shënuan në pjesën e parë nga Kotsionis në minutën e 2-të dhe nga Aleksi në minutën e 40-të. Laçi u përpoq me çdo formë për ta çarë murin gjirokastrit në pjesën e dytë, por ishte shumë vonë dhe “shqiponjat” e Luftëtarit e ruajtën të paprekur portën e tyre në këtë duel, duke marrë 3 pikë të vyera nga kjo përballje, 3-pikësh që e largon disi nga skuadrat e tjera në zonën e mbijetesës, konkretisht Kastriotin që ka 16 pikë dhe Kamzën që mbetet e fundit me 15 pikë. Për trajnerin Besnik Prenga kjo ishte një humbje e rëndë, sepse ndodh në fushën e Kurbinit.

Atje ku Laçi është si kështjellë e pamposhtur dhe nuk ndodh thuajse kurrë të humbasë ndeshje, teksa mbetet në vend të katërt me 31 pikë, duke mos e bërë diferencën me ndjekësit që humbën duelet e tyre, pasi Skënderbeu dhe Flamurtari që mbajnë vendin e pestë dhe të gjashtë kishin pësuar disfatë të shtunën. Pra Laçi nuk e shfrytëzoi këtë moment për t’u afruar me skuadrat e kreut dhe për të rritur pretendimet e tij.

Kategoria Superiore

Java e 20-të

Të premten, 1 shkurt 2019:

Tirana – Teuta                       1-1

Të shtunën, 2 shkurt 2019:

Kastrioti – Skënderbeu        2-1

Kukësi – Flamurtari              1-2

Të dielën, 3 shkurt 2019:

Laçi – Luftëtari                       0-2

Kamza – Partizani                0-1

Renditja

Nr. Skuadra               Pikë

1. Partizani 43
2. Kukësi 38
3. Teuta 35
4. Laçi 31
5. Skënderbeu 30
6. Flamurtari 29
7. Tirana 21
8. Luftëtari 20
9. Kastrioti 16
10. Kamza 15