ASNN – Pas ndeshjeve të Kupës së Shqipërisë që u luajtën në mesjavë, rikthehet kampionati me ndeshjet e radhës në Kategorinë Superiore, me takimet e javës së 21-të, që do të luhen të ndara në dy ditë, të dielën dhe të hënën.
Ndeshja hapëse e kësaj jave është Laçi-Teuta, një takim që do të luhet të dielën në stadiumin e Laçit, duke nisur nga ora 13:30. Në po të njëjtën ditë do të luhen edhe dy ndeshje të tjera, Vllaznia-Partizani dhe Tirana-Skënderbeu.
Të kuqtë e drejtuar nga trajneri Orges Shehi do të udhëtojnë drejt Shkodrës për t’u përballur me Vllazninë e homologut Qatip Osmani, me sfidën që do të zhvillohet në Stadiumin “Loro Boriçi”, duke nisur nga ora 17:00.
Sakaq, në po të njëjtën orë e ditë do të luhet në kryeqytet edhe sfida Tirana-Skënderbeu. Ndërkohë, të hënën do të luhen edhe dy ndeshjet e tjera të javës së 21-të të Kategorisë Superiore.
Takimi i parë i ditës së hënë do të jetë Egnatia-Erzeni, që do të zhvillohet në Stadiumin e Rrogozhinës, “Egnatia Arena”, prej orës 13:30. Ndeshja mbyllëse e kësaj jave është Dinamo-Kukësi, që do të luhet në Stadiumin “Niko Dovana”, duke nisur nga ora 17:00.
