ASNN – Janë zhvilluar sot ndeshjet e javës së 16-të të Kategorisë Superiore të Kampionatit Kombëtar të Futbollit. Partizani rikthehet tek fitorja pasi mundi Vllazninë 3-1. Skënderbeu shpallet kështu “kampion i dimrit”, pasi e ka fituar edhe ndeshjen e fundit ndaj Teutës 3-1. Kategoria Superiore ka zhvilluar të premten javën e 16-të dhe të fundit për vitin 2017.
Skënderbeu është shpallur “kampion i dimrit” teksa ka fituar me rezultatin 3-1 në sfidën e fundit të luajtur në Korçë ndaj Teutës. Korçarët e panë veten në disavantazh pas golit të shënuar nga Dediç, por arritën të përmbysnin gjithçka, falë golave të Ali Souesë në minutën e 36-të dhe të 81-të dhe golit të Xhejms Adenijit, në minutën e 85-të. Mban hapin e korçarëve Flamurtari, që fitoi në Kamëz 3-0 me golat e Ardit Hoxhaj, Zhufos dhe Tungaras.
Pas disfatës 5-0 në Gjirokastër, rikthehet tek fitorja Partizani që mundi Vllazninë me rezultatin 3-1, duke i zhytur shkodranët akoma më shumë në zonën e ftohtë. Dy gola mjaft te shpejtë në pjesën e parë me Ibrahimin, në minutën e 9-të, që kaloi në epërsi skuadrën e Starovës, dhe Çinarin, që barazoi në të 11-tën për shkodranët. Fitorja e Partizanit u vulos në pjesën e dytë, falë golave të Gerhard Prognit në minutën e 65-të dhe Jurgen Bardhit në minutën e 83-të.
Tjetër fitore me peshë për Luftëtarin që i jep një shuplakë Kukësit, duke triumfuar në Stadiumin “Zeqir Ymeri” me shifrat 2-1 dhe tashmë duket se periudhës së trajnerit Mlladen Milinkoviç në drejtimin e verilindorëve i ka ardhur fundi. Gjirokastritët shënuan dy herë me Kristal Abazajn dhe Rrocën ndërsa Elis Bakaj realizoi golin e vetëm për Kukësin me 11-metërsh.
Në sfidën tjetër, Laçi mundi Lushnjën me rezultatin 3-1, me gola të Rexhinaldos, Uzunit dhe Xhixhës, ndërsa myzeqarët realizuan golin e barazimit të përkohshëm me Sefën. Në fund të javës së 16-të, që ishte edhe e fundit për këtë vit, kryeson Skënderbeu me 37 pikë, i ndjekur nga Flamurtari me 28, Laci me 27, Kukësi me 25, Partizani me 24 dhe mbyllin tabelën e renditjes Teuta dhe Vllaznia, me nga 15 pikë secila dhe Lushnja, me 8 pikë.
