ASNN – Tirana e Borovës shkatërron Vllazninë dhe e mbyll në vend të parë. Java e 16-të e Grupit A në Kategorinë e Parë të Kampionatit të Basketbollit për Femra, dhuroi jo pak emocione dhe rivalitet, por Shoqata e Klubit të Basketbollit të Tiranës, e trajnerit Edal Borova, ia doli me sukses të sigurojë praktikisht vendin e parë në renditje. Ishte një sukses i merituar dhe që i jep moral ekipit të Borovës për në fazën e “play-off”-it.

Ditën e shtunë, SHKBF Tirana mundi në Pallatin e Sportit “Qazim Dervishi” në Shkodër ekipin e Vllaznisë, me rezultatin e thellë 97-69, duke marrë dy pikë të plota dhe duke shkuar në 34 pikë, 3 më shumë se rivalët kryesorë, SHBF Tirana e trajneres Mirza Alibegaj dhe Flamurtari i trajnerit Viron Toska, si dhe duke siguruar vendin e parë në renditje.

Në Shkodër, Vllaznia u përpoq të vendoste diktatin e saj, por përballë një skuadre me lojtare mjaft cilësore, të ardhura sidomos në merkaton e dimrit, kjo ishte e pamundur. Epërsia e skuadrës së Borovës nuk u vu në diskutim gjatë gjithë ndeshjes dhe vajzat bardheblu ishin teknikisht më lart se shkodranet në të katër pjesët e lojës. Kuptohet, diferenca prej 26 pikësh flet më mirë se çdo gjë tjetër.

Ndërkohë, vetë Vllaznia ruan vendin e katërt me 27 pikë dhe praktikisht e ka siguruar edhe ajo top-4 që vlen për “play-off”-in. Është fakt nga ana tjetër që këto dy skuadra do të përballen sërish bashkë, në fazën gjysmëfinale të “play-off”-it, pasi dihet nga formula e garës që vendi i parë përplaset me vendin e 4-t, ndërsa vendi i dytë, përplaset me vendin e 3-të në tabelën e renditjes.

Praktikisht dueli më i vështirë është ai për vendin e dytë, ku Tirana e Alibegajt përplaset me Flamurtarin e Toskës, dy rivale mjaft të forta. Ndërkohë, duhet thënë se të premten, po në kuadër të javës së 16-të, Tirana e Alibegajt fitoi në Elbasan, në Pallatin e Sportit “Tomor Sinani”, ndaj skuadrës vendase të Elbasanit me shifrat e thella 100-48, kurse Flamurtari shkatërroi Studentin në kryeqytet 81-68.

Kampionati Kombëtar

i Basketbollit – Femra

Kategoria e Parë

Grupi A

Java e 18-të

Të premten, 29 mars 2019:

Studenti – Flamurtari           68-81

Elbasani – Sh.B.F. Tirana   48-100

Të shtunën, 30 mars 2019:

Vllaznia – Sh.K.B.F Tirana 59-97

Renditja

Nr.       Skuadra                     N.        F.         H.        Pikë

1. SHKBF Tirana          18        16          2        34
2. SHBF Tirana             18        13          5        31
3. Flamurtari                  18        13          5        31
4. Vllaznia                     18          9          9        27
5. Studenti                     18          3        15        21
6. Elbasani                    18          0        18        18