ASNN – Kategoria Superiore do të luajë të dielën dhe të hënën ndeshjet e javës së 13-të të saj, ku padyshim kalendari ofron duele mjaft interesante si ndërmjet skuadrave që janë në krye të tabelës së renditjes, ashtu dhe ndërmjet skuadrave që mbyllin klasifikimin. Me interes është ndeshja midis dy vendeve të fundit në tabelë, Kastriotit (4 pikë) dhe Kamzës (8 pikë).

Një duel ku ose krutanët fitojnë dhe i japin shpresë vetes për të luftuar për mbijetesë, ose zhyten dhe më keq akoma dhe mund të konsiderohen që tani kandidatë për të rënë nga kategoria. Në Krujë edhe Kamza do të ketë një shans të ndryshojë “kurs”, në të kundërt rrezikon të zhytet edhe ajo në “errësirë”, pra të rrezikojë rënien në fund të sezonit.

Por duel interesant në kuadër të javës së 13-të është dhe ai në Gjirokastër midis Luftëtarit dhe Tiranës. Të dyja skuadrat kanë nga 10 pikë, por janë në grupin e skuadrave të fundit, që nuk po i largohen zonës së rrezikut dhe cilado ta humbasë këtë ndeshje do të bjerë moralisht dhe do ta ketë të vështirë të rikuperojë. Kurse skuadra që fiton jo vetëm ngjitet në tabelë, por i jep vetes shtysë psikologjike pozitive që të mendojë për mbijetesën.

Duelet e tjera të kësaj jave përfshijnë një përplasje mjaft të nxehtë në Korçë midis Skënderbeut dhe Flamurtarit, si dhe dueli derbi në kryeqytet midis Partizanit dhe Laçit. Një duel i drejtpërdrejtë për renditjen është dhe ai që do të luhet të hënën midis Kukësit dhe Teutës. Aktualisht, renditjen e Kategorisë Superiore e kryeson Partizani, me 28 pikë, dy më tepër sesa Skënderbeu, ndërsa Laçi mban vendin e 3-të, me 22 pikë.

Kategoria Superiore

Java e 23-të

Të dielën:

Kastrioti – Kamza                  (14:00)

Luftëtari – Tirana                   (14:00)

Skënderbeu – Flamurtari    (17:00)

Partizani – Laçi                     (17:00)

Të hënën:

Kukësi – Teuta                      (14:00)