ASNN – Superliga e meshkujve, Studenti ndal Tiranën “kampione”, Erzeni fiton derbin me Teutën. Janë luajtur kështu ndeshjet e javës së 11-të të nivelit më të lartë të Kampionatit Kombëtar të Volejbollit për Meshkuj. Ndeshja PartizaniVllaznia është ndërprerë në fund të setit të tretë (2-1 për kryeqytetasit) dhe do të rikuperohet ditët në vijim.

Befason Studenti, që në derbin kryeqytetas mundi 3-2 (25-20, 21-25, 29-27, 14-25, 15-11) Tiranën “kampione” në fuqi, ndeshje e luajtur në Pallatin e Sportit “Asllan Rusi” në kryeqytet. Dy herë Studenti doli në epërsi e po dy herë u arrit nga bardheblutë, por në setin final studentorët ishin më konkretë dhe e merituan fitoren, që i afron me 4-shen e parë të renditjes.

Fitore me rëndësi korri Elbasani, që mundi 3-1 (19-25, 26-24, 25-23, 25-4) Skënderbeun dhe shpreson për një vend për në “play-off”. Edhe pse miqtë fituan setin e parë nuk arritën të fitojnë më, në një ndeshje me emocione shumicën e kohës. Ndërkaq, një fitore të lehtë korri ekipi i Erzenit, që mundi 3-0 (25-16, 25-19, 25-21) Teutën në derbin durrsak.

Edhe pse loja e ekipit të Teutës erdhi në rritje nga seti në set, skuadra shijakase ishte

vazhdimisht superiore, duke marrë tri pikë të rëndësishme për renditje.

Kampionati Kombëtar

Volejboll – Meshkuj

Superliga

Java e 11-të

Elbasani – Skënderbeu       3-1

Studenti – Tirana                  3-2

Partizani – Vllaznia  (E ndërprerë 2-1)

Teuta – Erzeni                       0-3

Renditja

1. Partizani 30 pikë*
2. Erzeni 24 pikë
3. Tirana 21 pikë
4. Vllaznia 20 pikë*
5. Studenti 18 pikë
6. Skënderbeu 9 pikë
7. Elbasani   6 pikë
8. Teuta   1 pikë

*Partizani e Vllaznia kanë një ndeshje më pak.