ASNN – Skënderbeu dominon Superligën për femra, Tirana fiton derbin me Barleti Volej. Kështu, Skënderbeu nuk e lëshon kreun e renditjes në nivelin më të lartë të Kampionatit Kombëtar të Volejbollit për Femra, pas fitores 3-0 (32-30, 25-17, 25-16) ndaj Lushnjës në kryeqytet.

Një përballje mes dy ekipeve që janë në skajet e kundërta të renditjes, ndaj fitorja e korçareve ishte një formalitet, pavarësisht emocioneve që dhuroi seti i parë, që ishte një maratonë. Po 3-0 (25-21, 25-14, 25-8) fiton edhe Tirana, që mundi Barleti Volejin në derbin kryeqytetas.

Loja e skuadrës universitare erdhi në rënie nga seti në set, ndërkohë që epërsia e bardhebluve ishte e madhe, duke e merituar fitoren. Pogradeci fitoi 3-1 ndaj Teutës në Durrës (22-25, 25-15, 25-11, 25-17), një fitore me përmbysje e ekipit liqenor, që synon një vend në katërshe.

Mikeshat e nisën jo mirë ndeshjen, por më pas morën kontrollin e lojës në dorë dhe e dominuan ndeshjen. Ndërkaq, ndeshja Partizani-Vllaznia në volejboll për femra, u shty për një datë tjetër, pas ngjarjes tragjike që ndodhi në Pallatin e Sportit “Asllan Rusi”, ku një i ri humbi jetën në sallën kryesore.

Kampionati Kombëtar

Volejboll – Femra

Superliga

Java e 11-të

Lushnja – Skënderbeu        0-3

Barleti Volej – Tirana            0-3

Teuta – Pogradeci                1-3

Partizani – Vllaznia              (E shtyrë)

Renditja

1. Skënderbeu 31 pikë
2. Partizani 27 pikë*
3. Tirana 27 pikë
4. Barleti Volej 15 pikë
5. Vllaznia 13 pikë*
6. Pogradeci 13 pikë
7. Teuta   3 pikë
8. Lushnja   0 pikë

*Partizani e Vllaznia kanë një ndeshje më pak