ASNN – “It’s the final countdown!” Dhe kështu është, sepse numërimi mbrapsht për Botërorin ka hyrë në javën e fundit, ndërsa vëmendja përqendrohet tek Katari. Vendi mikpritës i Botërorit të Futbollit ka shpenzuar afro 200 miliardë dollarë, në ndërtimin e stadiumeve dhe infrastrukturës. Ndërsa gjithçka është gati për të dielën, ndeshjen hapëse të botërorit. Kështu, ka nisur të hënën numërimi mbrapsht, kur ka mbetur edhe një javë nga nisja e Botërorit të Futbollit.

E vëmendja e të gjithë futbollistëve të kombëtareve pjesëmarrëse në këtë Botëror është përqëndruar te një nga turnetë më të diskutueshëm në histori. Turneu i parë botëror që do të mbahet në botën arabe do të nisë të dielën, kur përfaqësuesja e vendit pritës do të përballet me Ekuadorin. Ajo ndeshje do të shënojë kulmin e fushatës së jashtëzakonshme të Katarit për të nisur spektaklin pas shpenzimesh prej dhjetëra miliarda dollarësh për të ndërtuar stadiume dhe infrastrukturë.

Botërori i futbollit në një shtet në shkretëtirë ka bërë të nevojshme një riorganizim të paprecedent të kalendarit ndërkombëtar të futbollit, duke e zhvendosur Botërorin në dimër, për të shmangur vapën përvëluese të Gjirit. Vendi me gati 3 milionë banorë, një nga prodhuesit më të mëdhenj të gazit natyror në botë, ka shpenzuar shumë. Stadiumet e reja kushtuan më shumë se 6.5 miliardë dollarë dhe një sistem metroje të trenave pa drejtues shkoi deri në 36 miliardë dollarë.

Shpenzimet e përgjithshme të infrastrukturës gjatë dhjetëvjeçarit të fundit shkuan deri  në 200 miliardë dollarë. Organizatorët kanë parashikuar se më shumë se një milionë tifozë do të udhëtojnë në Katar. 2.9 milionë nga 3.1 milionë biletat janë shitur. Në Evropë, ndjehet shumë shqetësimi për akomodimin dhe qëndrimin në një vend pa asnjë traditë të organizimit të një turneu futbolli. Edhe ndërtesa e Komitetit të Rindërtimit të Katarit në qytetin e Gazës është zbukuruar me stemën e FIFA-s dhe pamjen e trofeut të Botërorit.