ASNN – Interi e ka nisur mjaft keq pjesëmarrjen në fazën e grupeve të Ligës së Evropës, pasi është mundur 0-2 në Stadiumin “San Siro” të Milanos nga izraelitët e Hapoel Bir Shevas.
Sikundër edhe sezonin e shkuar, edhe këtë sezon, Liga e Evropës do të vijë çdo të enjte për sportdashësit drejtpërdrejt në ekranin e Rrjetit të Radio-Televizionit Shqiptar, me transmetimin e një ndeshjeje si dhe të gjithë golat e mbrëmjes.
Pas Ligës së Kampioneve, edhe veprimtaria e dytë e klubeve të kontinentit, Liga e Evropës, ka nisur sonte fazën e ndeshjeve në grupe. Në këtë fazë marrin pjesë 48 skuadra, të ndara në 12 grupe me nga 4 skuadra secili.
Takimi i përzgjedhur sonte për transmetim në ekranin e Rrjetit të Radio-Televizionit Shqiptar ishte ai i zhvilluar në Stadiumin “San Siro” të Milanos, midis Interit vendas dhe izraelitëve të Hapoel Bir Shevas, i vlefshëm për grupin K.
Hapoel Bir Sheva mban vendin e parë në kampionatin izraelit, me 7 pikë të marra në 3 ndeshje dhe ka treguar se është një skuadër me potencial, pasi ka fituar me rezultatin 2-0.
Pjesa e parë është mbyllur me rrjeta të paprekura, ndërsa në të dytën, izraelitët kanë gjetur dy herë rrugën e rrjetës. Migel Vitor ka shënuar golin e parë në minutën e 54-ët, ndërsa 15 minuta më pas, Buzalo ekzekuton mjeshtërisht një goditje të lirë dhe përshëndet rrjetën.
Interi, që aktualisht renditet i 11-ti në Serinë A të Italisë, me vetën 4 pikë të marra në 3 ndeshjet e para të këtij sezoni, ka qenë i zbehtë në lojën e vet, duke u mundur kështu me rezultatin 0-2.
