ASNN – Të martën pasdite, Ylber Shehi është përcjellë për në banesën e fundit. Një figurë që do t’i mungojë volejbollit shqiptar, ndërsa e kanë nderuar shumë mjeshtëra të rrjetës shqiptare.

Ka luajtur për rreth 20 vjet, nga viti 1962, deri më 1982-shin, me Dajtin dhe Studentin. Madje ka qenë edhe anëtar i ekipit kombëtar, teksa ka marrë pjesë në Eliminatoret e Evropianit, ndërsa kuqezinjtë drejtoheshin prej Mjeshtrit të madh, Vangjel Koja.

Ndër arritjet e tij shënohet dalja fitues i Kupës së Republikës më 1969 me Dajtin. Për të gjitha këto arritje dhe kontributin e tij, ai është nderuar nga figurat e volejbollit shqiptar në ndarjen nga jeta.

AlbanianSport.com i shpreh ngushëllimet e saj familjes Shehi për ndarjen nga jeta të Ylberit, një figurë që do t’i mungojë volejbollit shqiptar.