ASNN – Është ndarë sot nga jeta në moshën 71-vjeçare, në qytetin e tij të lindjes, në Shkodër, gazetari dhe komentatori i mirënjohur i sportit, Ymer Striniqi, i cili një jetë të tërë ia kushtoi mikrofonit, duke përcjellë emocione pafund për dëgjuesit e teleshikuesit.

Ymer Striniqi, një nga bashkëpunëtorët e hershëm të Radio-Televizionit Shqiptar, do te kujtohet gjithmone si gazetari dhe komentatori sportiv i përkushtuar, statisticieni i rrallë dhe me dije të gjera në fushën e sportit.

Gazetari dhe statisticieni që ka arkivuar si rrallëkush tërë dinamikën e ngjarjeve sportive në mbi pesë dekada, ka lënë një trashëgimi gjeniale në plotësimin e të vërtetave të historisë dhe përcjelljen e tyre me zërin brilant në mikrofon, me pasion e autoritet të padiskutueshëm.