ASNN – Ndahet nga jeta në moshën 87-vjeçari ish-basketbollisti dhe ish-trajneri i njohur kryeqytetas. Është ndarë te enjten nga jeta në moshën 87-vjeçare, mjeshtri i madh i basketbollit dhe sportit shqiptar, Njazi Lleshi. Ai u lind në Tiranë më 12 prill 1934, ndërsa përfundoi Institutin e Fizkulturës, Dega “Mësuesi”, në vitin 1971. Lleshi, i cili mbante në fanellë numrin 5, është aktivizuar si basketbollist me ekipin e Partizanit gjatë periudhës 1950-1956, me Tiranën në 1957-ën dhe sërish me Partizanin në periudhën 1958-1964.
Me ekipin kombëtar Lleshi luajti 5 ndeshje, ato ndaj Jugosllavisë, Bullgarisë, Rumanisë dhe dy përballje ndaj ish-RDGJ. Si sportist, ai ka fituar titulli “kampion” me Tiranën më 1957-ën, por edhe me Partizanin në vitet 1956, 1958, 1959, 1960. Po kështu, me të kuqtë kryeqytetas, ai ka fituar edhe Kupën e Shqipërisë me Partizanin në vitin 1960. Ai ka vijuar më pas të punojë si trajner me të rinjtë e Partizanit, në periudhën 1962-1974, me të rriturit e Partizanit në periudhën 1974-1975, me të rriturat e Partizanit në periudhën 1981-1989.
Por edhe me të rriturat e Klubit “Studenti” në periudhën 1992-1996. Si trajner, ai ka fituar titulli “kampion” me të rinjtë e Partizanit në vitet 1971, 1972, 1973, 1974, me të rriturit e Partizanit në sezonet 1973-1974 dhe 1974-1975 dhe me të rriturat e Partizanit në sezonin 1988-1989. Po kështu, Njazi Lleshi është fitues i Kupës së Shqipërisë me Partizanin në 1975-ën. Kanë qenë të shumta vlerësimet që i janë dhënë atij, të tilla si
“Mjeshtër i Madh” (2011), “Mjeshtër Sporti” (1959), “Nderi i Sportit Shqiptar” (2000), “Mirënjohje e qytetit të Tiranës” (2000), ndërsa dekoruar me medaljen “Naim Frashëri” (1981), me Urdhrin “Naim Frashëri” (kl. II 1986, kl. I 1989), por edhe me “Medalje e artë” (1996). Me humbjen e tij, sporti shqiptar ka humbur një personalitet të spikatur dhe një njeri që ka nxjerrë një numër të rinjsh të talentuar që shkuajtën më pas faqe të arta të koshit shqiptar.
