ASNN – Ish-komentatori i njohur sportiv shuhet në moshën 77-vjeçare pas një sëmundjeje të rëndë. Gazetari i njohur sportiv, Aleko Gjergo, i cili vuante nga një sëmundje e rëndë, është ndarë sot nga jeta. Gjergo ka qenë një nga bashkëpunëtorët kryesorë të emisionit më të ndjekur sportiv të Radio-Tiranës, “Nga njëra ndeshje në tjetrën”. Ai do të mbetet në kujtesë jo vetëm si gazetar i njohur sportiv, por edhe autor i disa librave dhe disa përkthimeve.

Ish-komentatori sportiv i Radio-Tiranës, Aleko Gjergjo, është ndarë sot nga jeta në moshën 77-vjeçare. Sipas informacioneve që kanë përcjellë familjarët, gazetari i njohur sportiv vuante nga një sëmundje e rëndë. Aleko Gjergo do të mbetet në kujtesë jo vetëm si gazetar i njohur sportiv, por edhe autor i disa librave dhe disa përkthimeve. Ai u lind më 23 nëntor 1943, ndërsa për një pjesë të madhe të kohës, Gjergo ka qenë një nga bashkëpunëtorët kryesorë të emisionit më të ndjekur sportiv të Radio-Tiranës, “Nga njëra ndeshje në tjetrën”.

Transmetimet e tij, sigurisht janë pjesë e fondit të artë të radiokronikës tonë, ndërsa zëri i tij i ngrohtë ofronte gjithmonë mendimin objektiv dhe gjithnjë të paanshëm, por edhe shumë të thjeshtë. Përtej pasionit të tij për sportin, Gjergo ka spikatur edhe për veprimtarinë e pasur në fushën e publicistikës historike dhe në atë të përkthimeve. Ai gjithashtu është autor i botimeve sportive, siç ishte libri i tij, “Evoluimi i radiokronikës së futbollit në vitet ‘90”.

Radio-Televizioni Shqiptar ka shprehur keqardhjen për ndarjen nga jeta të një bashkëpunëtori të vyer dhe i shpreh ngushëllimet familjes së Aleko Gjergos, ngushëllime të cilave u bashkohet edhe AlbanianSport.com.