ASNN – “Covid-19” i merr jetën njeriut që u dha bardhebluve 3 tituj “kampion” dhe 6 trofe në total. Futbolli shqiptar ka humbur të shtunën një tjetër protagonist që ka shkruar faqe të arta të tij, e sidomos atij të kryeqytetit, ndonëse jo duke luajtur vetë në fushën e blertë.
Kështu, ish-presidenti i Klubit të Tiranës, Metush Seferi, nuk e ka fituar dot betejën me virusin korona, duke u ndarë nga jeta në moshën 77-vjeçare. Ai prej ditësh po kurohej për të mposhtur virusin Covid-19, ndërsa së fundmi ishte futur në intubim, ku nuk arriti dot të mbijetonte.
Metush Seferi ka qenë presidenti i Tiranës gjatë viteve 1993-1998, duke shkruar një tjetër epokë të suksesshme në historinë e bardhebluve kryeqytetas. Në epokën e tij, Tirana, mundi të fitonte tre tituj radhazi “kampion”, dy Kupa të Shqipërisë si dhe një Superkupë.
Me gjak bardheblu, një “tirons”, i vërtetë dhe mbi të gjitha zotëri i vërtetë, Metush Seferi dha një kontribut të madh në klubin 25-herë kampion të Shqipërisë dhe ikja e tij lë pas dhimbjen për familjen e tij dhe atë të futbollit.
