Tirana e basketbollit të meshkujve ka marrë një “grusht” të rëndë në Jasmin të Maqedonisë, atje ku në “Kavadarçi” është shkërmoqur duke u mundur me plot 41 pikë diferencë. Që do të thotë se fitorja e ndeshjes së parë së Ligës Ballkanike, por dhe ajo në kampionat ndaj Vllaznisë nuk kanë qenë një tregues i mirë për bardheblutë e Sllobodan Petrovski.

Sepse jo vetëm që nuk kanë dhënë një motivim ndryshe, por duket se e kanë shfaqur skuadrën me defekte. Sidomos kjo dhe për faktin se maqedonasit kanë bërë një mbulim të fortë ndaj pikave më të forta të Tiranës si Xhonson, Hysenagolli, apo dhe Ramé. E përkundër kësaj, ndërsa vendësit kanë luajtur “liro e shtrëngo”, edhe të ardhurit nga stoli nuk e kanë ndihmuar Tiranën të ekuilibrojë.

Ndaj ka vend për shumë korrigjime, sepse nëse kjo skuadër kërkon të jetë në turin e dytë të Ligës Ballkanike nuk mund të pranojë që të jetë ndryshe në fushën e vet e ndryshe në fushë të huaj, deri në një humbje me 41 pikë diferencë si kjo e djeshmja, e cila më së shumti duket sikur e kthen basketbollin shqiptar në origjinë në përballjet e saj ndërkombëtare.

Një rezultat që nuk lë shumë më vend për komente e diskutime për këtë paraqitje aspak të kënaqshme të Tiranës, e cila me të gjitha ndryshimet që ka bërë në prag të Ligës Ballkanike të Basketbollit për Meshkuj nuk duhet të ishte si në mbrëmjen e djeshme në Jasmin të Maqedonisë.