ASNN – Tanimë nuk ka dyshime dhe, përkundër gjithë zhurmës, Herri  Kejn duket se do të pranojë të qëndrojë te Totenhemi. Transferimi i mundshëm i kapitenit të Anglisë tek Mançester Siti ishte bërë cështja më e madhe në merkaton e verës. Por duket se sulmuesi do të heqë dorë nga dëshira e tij për t’u larguar këtë sezon nga Totenhemi. Presidenti i klubit londinez, Daniel Levi, ka qëndruar i vendosur në vendimin e tij se golashënuesi më i mirë i klubit në 7 sezonet e fundit nuk është në shitje këtë verë.

Çdo lëvizje e Kejnit për tek Mançester Siti ka të ngjarë të kushtojë të paktën 150 milionë stërlina, duke eklipsuar shifrën që kampionët e Premier Ligës paguan për Xhek Grilishin në fillim të kësaj vere. Oferta fillestare e Sitit për 100 milionë stërlina sulmuesin e përfaqësueses së “Tre Luanëve” në qershor vlen ende. Por kur kanë mbetur edhe 7 ditë nga mbyllja e merkatos, duket se largimi i Kejnit nga Totenhemi duket praktikisht i pamundur. Mediat britanike raportonin në fillim të kësaj jave se Mançester Siti pritej të niste një ofertë të re për të blerë Kejnin.

Kjo, në kuadër të një marrëveshjeje me vlerë 125 milionë stërlina, pasi nuk heq dorë nga sulmuesi. 28-vjeçari u bë objektivi i vetëm i trajnerit Pep Guardiola për të zëvendësuar golashënuesin e rekordeve të klubit Serxhio Aguero, pasi u bë e qartë se e ardhmja e afërt e Erling Ha’alandit ishte me Borusian e Dortmundit. Por duket se Siti do të heqë dorë nga Kejn, pasi drejtuesit e Totenhemit nuk po binden për ta shitur sulmuesin. Mançester Siti tani mund ta kthejë vëmendjen te nënshkrimi me Erling Ha’aland e Borusias së Dortmundit për vitin e ardhshëm.

Sidoqoftë, sa i përket kapitenit të Anglisë, tashmë nuk ka dyshime që largimi i nuk do ndodhë dhe këtë na e vërteton vetë Herri Kejn përmes një postimi në rrjetin social “Twitter”. “Ishte e pabesueshme të shihja pritjen nga tifozët e Totenhemit të dielën dhe të lexoja disa nga mesazhet mbështetëse që kam pasur në javët e fundit”, – shkroi kapiteni i Anglisë, duke shtuar në mbyllje: “Do të qëndroj tek Totenhem këtë verë dhe do të jem 100% i përqendruar që të ndihmoj këtë ekip për të arritur suksesin.”