Hendbolli shqiptar njihet në gjykatë, por merr mbështetjen nga ndërkombëtarët. Sekretari i përgjithshëm i Federatës Evropiane të Hendbollit (EHF), Mikael Viederer, ka pritur dhe së bashku me institucionin e tij ka dëgjuar projektet e Sekretarit të Përgjithshëm të Federatës Shqiptare të Hendbollit, Armand Çakalli. Ndihmë e pakursyer dhe premtime për realizime. Në fillimi të kësaj jave, kryekzekutivi i Federatës Shqiptare të Hendbollit ka pasur takimin e tij më të rëndësishëm, sepse është pritur në Vjenë nga sekretari i përgjithshëm i Federatës Evropiane të Hendbollit, Mikael Viederer.
Së pari, Çakalli ka diskutuar për hendbollin në plazh me Peter Froskin. Më pas për prioritetet dhe zhvillimin e sportit të hendbollit në përgjithësi me Helmut Hortsh. Për veprimtaritë kombëtare dhe ndërkombëtare me Markus Glaser dhe Peter Siselshmid. Kurse për transferimin e lojtarëve me Doru Simion. “Ne kemi arritur një marrëveshje me Federatën Evropiane të Hendbollit për zhvillimin e hendbollit në plazh në vendin tonë, ndërsa na kanë premtuar edhe bazë materiale për zhvillimin e saj”, – ka thënë fillimisht Çakalli.
Më pas, ai është ndalur në pikën e dytë, e cila duket se ka qenë edhe themeli i diskutimit me ndërkombëtarët. “Zhvillimin e hendbollit në përgjithësi ne e kemi paraqitur nëpërmjet dy projektet, por pikësëpari i kemi bërë një panoramë të situatës ku ndodhemi, – ka sqaruar ai. – Projekti i parë ka qenë për prioritetet, ndërsa na është premtuar që më 19 dhe 20 shkurt 2016 të diskutohet dhe më pas të na vijë dhe mbështetja financiare. Ne e kemi zhvilluar kështu këtë projekt të prioriteteve të shtrirë në tre vite në shkollat 9-vjeçare.”
“Më 2016-ën në 60 shkolla, më 2017-ën 20 shkolla dhe më 2018-ën në 20 shkolla, – ka vijuar Çakalli. – Dhe në total 100 shkolla, në të cilat luhet hendboll i mirëfilltë, sepse për këtë do të kemi nga ndërkombëtarët edhe mbështetjen me bazë materiale. Së dyti zhvillimin e hendbollit në përgjithësi e kemi parashikuar nëpërmjet shkollave ndërkombëtare. Që do të thotë se nëpërmjet Federatës Evropiane të Hendbollit, Federatat homologe do të na mbështesin me kurse kualifikime për trajnerë e gjyqtarë. Sepse do të na marrë dy trajnerë e dy gjyqtarë dhe pas tre vjetësh do të kemi 12 trajnerë dhe 12 gjyqtarë të kualifikuar për një hendboll cilësor”.
