Shqipëria do ta ketë edhe një tjetër stadium të standardeve ndërkombëtare. E jo vetëm kaq, por dhe një stadium, i cili do të mbledhë kombëtaren e Shqipërisë. Bëhet fjalë për “Loro Boriçin”, tek i cili është premtuar që më 8 tetor të luhet ndaj Serbisë, e cila është edhe ndeshja e fundit eliminatore për Kampionatin Evropian “Francë 2016”. Pikërisht dje në Shkodër, i pari i qeverisë ka njoftuar nisjen e projektit, i cili do ta transformojë stadiumin aktual në një impiant modern, bashkëkohor dhe i tillë si në të gjithë Evropën.

Këshilli Kombëtar i Territorit i ndez dritën jeshile nisjes së punimeve për rindërtimin e stadiumit të Shkodrës “Loro Boriçi”. Në Shkodër ishte i pranishëm edhe kryeministri i vendit, Edi Rama, i cili foli për projektin e ri që sipas tij do të prezantohet brenda disa ditësh. “Do të ndërtojmë një stadium që i plotëson të gjitha kriteret e UEFA-s, – ka thënë ai. – Stadiumi aktual është një rrënojë që nuk e meritojnë qytetarët dhe sportdashësit e këtij qyteti.”

“Elbasan Arena është një shembull i shkëlqyer por stadiumi i ri i Shkodrës do të jetë më i mirë”, – theksoi kreu i ekzekutivit. Sipas projektit stadiumi i ri në Shkodër do të mbajë 17 mijë tifozë dhe do të kushtojë rreth 15 milionë euro. Fillimisht u parashikua që rikonstruksioni i stadiumit të Shkodrës do të përfundonte brenda muajit tetor për të pritur ndeshjen eliminatore kundër Serbisë, por me shtyrjen e nisjes së punimeve nuk është e sigurt nëse takimi i 8 tetorit do të luhet në qytetin verior.

Aktualisht, stadiumi i vetëm i përshtatshëm për organizimin e ndeshjeve ndërkombëtare në vendin tonë është “Elbasan Arena”.