ASNN – Në një ndeshje që është cilësuar nga specialistët si më e bukura e këtij sezoni të volejbollit të meshkujve, Studenti ka mposhtur të premten në mbrëmje Farka Volejin në një betejë epike me 5 sete, duke siguruar vendin në finale. Finalistja tjetër është Tirana, e cila, ndryshe nga Studenti, nuk ka patur probleme përballë Vllaznisë, duke e fituar edhe ndeshjen e dytë gjysmëfinale me shifrat 3-0.
Kampionati Kombëtar i Volejbollit për Meshkuj ka njohur dy skuadrat finaliste, të cilat janë Studenti dhe Tirana. Në ndeshjet e dyta gjysmëfinale të “play-off”-it për titullin “kampion”, Studenti i drejtuar nga trajneri Ylli Tomori, që e kishte fituar takimin e parë në fushën e vet, ka vuajtur në ndeshjen e dytë, të zhvilluar në Sallën Sportive “Fahrie Hoti” në kryeqytet përballë Farka Volejit.
Kjo e fundit, e cila është një surprizë e këndshme, pasi në 3 sezonet e para të pjesëmarrjes së saj në nivelin më të lartë të volejbollit shqiptar të meshkujve ka arritur një herë në finale të Kupës së Shqipërisë dhe një herë në “play-off”-in final, i ka bërë një sfidë të jashtëzakonshme kampionëve në fuqi në ndeshjen e dytë. Skuadra e trajnerit Dritan Bardhi e ka fituar setin e parë, por Studenti ka përmbysur në dy setet e tjera, duke i fituar ato.
Por Farka kthehet të fitojë setin e 4-t dhe gjithçka do të vendoset në setin e 5-të dhe të fundit, ku vendos përvoja e Studentit, që e fiton takimin 3-2 dhe, bashkë me të, edhe vendin në finale. Finalistja tjetër është Tirana, e cila, ndryshe nga Studenti, nuk ka patur probleme përballë Vllaznisë, duke e fituar edhe ndeshjen e dytë gjysmëfinale me shifrat 3-0 dhe duke siguruar të drejtën për të sfiduar kampionët në fuqi për kurorën e më të mirëve të volejbollit shqiptar të meshkujve.
Kampionati Kombëtar
i Volejbollit – Meshkuj
Kalendari i gjysmëfinaleve të
“play-off”-it për titullin “kampion”
Të martën, 12 prill 2016:
Studenti – Farka Voleji 3-0 (1-0)
(25-19, 25-18, 25-14)
Vllaznia – Tirana 1-3 (0-1)
(18-25, 25-23, 20-25, 16-25)
Të premten, 15 prill 2016:
Farka Volej – Studenti 2-3 (0-2)
(28-26, 25-27, 19-25, 25-21, 13-15)
Tirana – Vllaznia 3-0 (2-0)
(25-18, 26-24, 25-21)
