ASNN – Të dielën u luajtën gjysmëfinalet e para të “play-off”-it në basketboll për meshkuj, ku dy skuadrat e Durrësit, Teuta dhe Goga Basket regjistruan fitoret e para dhe bëjnë një hap drejt finales, pasi mundën ekipet e kryeqytetit, përkatësisht Partizanin dhe Tiranën. Kështu, Teuta mundi Partizanin me rezultatin 83-60, një fitore që shënon duelin e parë “play-off” midis tyre, të kaluar me sukses nga “Djemtë e detit”.

Të katër pjesët e lojës folën për ekipin durrsak, që e dominoi me meritë takimin, por diferenca erdhi në 10-minutëshin e dytë dhe të 3-të, ku Teuta fitoi përkatësisht me shifrat 23-10 dhe 27-17, kurse 10-minutëshi i parë dhe i katërt ishin të balancuar (19-18 dhe 15-15). Kjo fitore e ndihmon Teutën të hedhë një hap drejt finales, megjithëse ndeshja e kthimit favorizon Partizanin në kryeqytet.

Nëse fitojnë sërish durrsakët Teuta shkon direkt në finale, në të kundërt do të duhet të luhet edhe një ndeshje tjetër.Ndërkohë, Goga Basket regjistroi një fitore të vështirë me Tiranën, duke e mundur me rezultatin 81-74. Diferencën skuadra vendase e bëri në dy 10-minutëshat e parë, me shifrat 23-20 dhe 18-10. Dy 10-minutëshat në vijim i fituan bardheblutë me shifrat 17-20 dhe 23-24, por pa mundur të bënin diferencën.

Për pasojë fitoi ekipi privat i Durrësit, Goga Basket, e cila hedh një hap përpara drejt finales së madhe të “play-off”-it. Ashtu siç është rasti me Teutën, edhe Goga Basketit i duhet të fitojë duelin e kthimit me Tiranën, në të kundërt do të duhet të luhet edhe një ndeshje e 3-të finale. Natyrisht, për Gogën nuk do të jetë e lehtë pasi diferenca e vogël me pikë me bardheblutë dhe njëherësh eksperienca e Tiranës në nivele të tilla, sigurojnë spektakël dhe rivalitet të fortë deri në fund.

Mund të ketë edhe surpriza, megjithëse Goga Basket është favorite për të shkur në finale.  Duhet pranuar se këtë sezon skuadrat e Durrësit janë më lart se ato të kryeqytetit dhe këtë e dëshmon ecuria sezonale e ekipeve, renditja dhe natyrisht edhe fitoret e para në gjysmëfinale të “play-off”-it. Duelet e kthimit do të luhen ditën e mërkurë, më 24 prill, në orën 18:00.

Kampionati Kombëtar

i Basketbollit – Meshkuj

Faza e “play-off”-it

Ndeshjet gjysmëfinale:

Takimet e para:

Të dielën 21 prill 2019:

Goga Basket – Tirana          81-74

(23-20, 18-10, 17-20, 23-24)

Teuta – Partizani                   83-60

(19-18, 22-10, 27-17, 15-15)

Takimet e dyta:

Të mërkurën, 24 prill 2019:

Tirana – Goga Basket          (18:00)

Partizani – Teuta                   (18:00)

Takimet e 3-ta:

(Nëse nevojiten)

Të dielën, 28 prill 2019:

Goga Basket – Tirana

Teuta – Partizani